Pune News : राज्य सरकारने २०२४-२५ या वर्षातील राज्य पुरस्कृत कृषी यांत्रिकीकरण योजनेसाठी २७ कोटी ७५ लाख रुपयांच्या निधी वितरणास गुरुवारी (ता.२७) मान्यता दिली आहे. या निर्णयामुळे शेतकऱ्यांना आधुनिक यंत्रसामग्री खरेदीसाठी मोठी आर्थिक मदत मिळणार आहे. ज्यामुळे शेतीत कार्यक्षमता वाढवण्यास आणि उत्पादनात सुधारणा करण्यास मदत होईल.

या योजनेंतर्गत, ट्रॅक्टर खरेदीसाठी अनुसूचित जाती/जमाती, महिला, अल्प आणि अत्यल्प भू-धारक शेतकऱ्यांना ट्रॅक्टर किंमतीच्या ५० टक्के किंवा १ लाख २५ हजार रुपयांपैकी जी रक्कम कमी असेल ते अनुदान देण्यात येणार आहे. तसेच इतर शेतकऱ्यांसाठी हे अनुदान ट्रॅक्टर किंमतीच्या ४० टक्के किंवा १ लाख रुपये या दोन्ही रकमेपैकी कमी रक्कम असेल तेच अनुदान मिळणार आहे. या निर्णयामुळे शेतकऱ्यांना आर्थिक मदत मिळणार असून, यंत्रसामग्री खरेदीत मोठा दिलासा मिळणार आहे.

राज्य पुरस्कृत कृषी यांत्रिकीकरण योजनेंतर्गत लाभार्थ्यांची निवड महाडीबीटी पोर्टलवरून करण्यात येणार आहे. तसेच, या अनुदानाची रक्कम लाभार्थ्यांच्या आधार संलग्न बँक खात्यावर सार्वजनिक वित्तीय व्यवस्थापन प्रणालीद्वारे थेट वितरित केले जाणार आहे. यामुळे शेतकऱ्यांना त्यांचा अनुदानाचा लाभ सहज आणि सुरक्षितपणे मिळणार आहे.

या योजनेंतर्गत २०२४-२५ च्या अर्थसंकल्पात २५० कोटी रुपयांच्या निधीची तरतूद करण्यात आली आहे. यापैकी १५० कोटी रुपयांच्या निधीला प्रशासकीय मान्यता देण्यात आली आहे. या योजनेच्या अंमलबजावणीसाठी कृषी संचालकांनी निधी वितरणाची पत्राद्वारे विनंती केली होती. यानुसार सरकारने २७ कोटी ७५ लाख रुपयांच्या निधी वितरित केला आहे.

या निर्णयामुळे शेतकऱ्यांना अत्याधुनिक यंत्रसामग्री, कृषी अवजारे आणि तंत्रज्ञानाचा लाभ घेता येणार आहे, ज्यामुळे शेतीची कामे अधिक सुलभ, प्रभावी होणार आहेत.