Jalgaon News : एक दिवसीय बंद पाळल्यानंतर जिल्ह्यातील १२ बाजार समित्यांचे कामकाज पूर्ववत झाले आहे. मंगळवारी (ता. २७) शेतीमालाची आवक सुरू झाली. बुधवारी (ता. २८) देखील ज्वारी, हरभऱ्याची आवक झाली. जाहीर लिलावही पार पडले.

माथाडी कायद्याची राज्यभरात काटेकोरपणे अंमलबजावणी करावी, तसेच बाजार समितीचे केंद्रीकरण करणारे २०१८ चे विधेयक (राष्ट्रीय दर्जा बाजार समिती बनविणे) मागे घेण्यात यावे, या मागणीसाठी संचालक व कामगार संघटनांकडून जिल्ह्यातील सर्व बाजार समित्यांमधील कामकाज सोमवारी (ता. २६) बंद ठेवण्यात आले आहे.

या आंदोलनामुळे कोट्यवधींची उलाढाल ठप्प झाली होती. शेतकऱ्यांच्या अधिकारावर गदा आणणारा कायदा केंद्र सरकारने तातडीने मागे घ्यावा; अन्यथा बाजार समित्या बंद ठेवून या निर्णयास विरोध करण्याचे आवाहन स्वाभिमानी शेतकरी संघटनेचे नेते राजू शेट्टी यांनी केले होते. सोमवारी शेतकऱ्यांनी शेतीमाल बाजारात आणणे टाळले. फक्त फळे व भाजीपाला मार्केटमध्ये लिलाव झाले होते.

त्या अनुषंगाने जिल्ह्यातील सर्व बाजार समित्यांमध्ये कडकडीत बंद पाळल्याची माहिती स्वाभिमानीचे जिल्हाध्यक्ष डॉ. विवेक सोनवणे यांनी प्रसिद्धी पत्रिकाद्वारे दिली. माथाडी, हमाल आणि व्यापारी यांनीही या आंदोलनास पूर्ण पाठिंबा दिला.

जिल्ह्यातील सर्व बाजार समित्यांमध्ये शुकशुकाट होता. परंतु मंगळवारी व बुधवारी बऱ्यापैकी उलाढाल जळगाव, चोपडा व अन्य बाजार समित्यांत झाली. जळगाव बाजार समितीअंतर्गत मंगळवारी १० कोटींची उलाढाल झाली. चोपडा येथेही एक कोटींवर उलाढाल झाल्याची माहिती मिळाली.