Chandrapur News : जिल्ह्यात आधारभूत धान खरेदीकरिता नोंदणीची प्रक्रिया सुरू करण्यात आली. नोंदणीची प्रक्रिया कृषी उत्पन्न बाजार समितीच्या माध्यमातून सुरू आहे. सकाळपासून नोंदणीसाठी आलेले शेतकरी ताटकळत आहे.

त्यामुळे सेतू केंद्रातूनही ही प्रक्रिया करावी, अशी मागणी मूल सोशल फोरमचे संयोजक विजय सिद्धावार यांनी केली. तसे निवेदन त्यांनी पालकमंत्री सुधीर मुनगंटीवार यांना दिले आहे. पालकमंत्री मुनगंटीवार यांनी मूलसह आणखी दोन नोंदणी केंद्र सुरू करण्याबाबत जिल्हाधिकाऱ्यांना निर्देश दिले. मात्र, अजूनही केंद्र सुरू करण्यात आले नाही.

त्यामुळे या केंद्रावर शेतकऱ्यांची गर्दी वाढत चालली आहे. पहाटे पाच वाजेपासूनच शेतकरी नोंदणीसाठी आवश्यक कागदपत्रे घेऊन रांगेत लागत आहे. मात्र, अनेकांची नोंदणी होत नाही. त्यामुळे शेतकऱ्यांना आल्यापावली फिरावे लागत आहे. काही शेतकरी तीन-चार दिवसांपासून चकरा मारूनही नोंदणी होत नसल्याने संताप व्यक्त करीत आहे.

सध्या थंडीचे दिवस सुरू आहे. पहाटे व सायंकाळी उशिरापर्यंत या शेतकरी थंडीत कुडकुडत नोंदणीसाठी नावाचा पुकारा होईल या आशेवर खुल्या जागेत बसून असल्याचे दिसून येत आहे.

विशेष म्हणजे या शेतकऱ्यांत वृद्ध महिला शेतकऱ्यांचा समावेश आहे. बाजार समितीत पुरेसे मनुष्यबळ आणि संसाधने नाही. त्यामुळे नोंदणीची प्रक्रिया संथ गतीने सुरू आहे. मागील वर्षीही अशाच संथ गतीने नोंदणीची प्रक्रिया झाली. परिणामी नोंदणीची मुदत शासनाला वारंवार वाढवून द्यावी लागली होती.