Buldana News: केंद्र शासनाच्या आधारभूत किंमत योजनेअंतर्गत नाफेड तसेच ‘एनसीसीएफ’च्या (राष्ट्रीय सहकारी ग्राहक महासंघ) वतीने २७ मार्चपासून हरभरा खरेदीसाठी नोंदणी सुरू करण्यात आली आहे. आठवडाभरात हरभरा नोंदणीला अत्यल्प प्रतिसाद मिळाल्याचे दिसून आले आहे. गुरुवारपर्यंत (ता. तीन) अवघी ६१०८ शेतकऱ्यांनी नोंदणी केली होती. तर २२८ क्विंटल हरभरा खरेदी झाली.

हमीभावाने हरभरा खरेदीसाठी शासनाने नावनोंदणी सुरू करीत खरेदीसाठी केंद्रही सुरू केले. शेतकऱ्यांनी आवश्यक कागदपत्रांसह २५ एप्रिलपर्यंत संबंधित खरेदी केंद्रावर हरभरा खरेदीसाठी नोंदणी करावी, असे आवाहन प्रशासन वारंवार करीत आहे. मात्र शेतकऱ्यांचा फारसा प्रतिसाद मिळेनासा झालेला आहे.

याबाबत अंकुश देशमुख (सोनाळा) म्हणाले, की बाजारपेठेत हरभरा चांगल्या भावात जात आहे. ५६०० ते ५८०० पर्यंत दर मिळतो आहे. डॉ. गजानन गिऱ्हे (देऊळगावमाळी) म्हणाले, की एकतर आता बाजारभाव हमीभावाजवळ मिळतो आहे. दुसरे म्हणजे या यंत्रणेत मापात पाप होते. शंभर ते दोनशे रुपये खर्च लागतो. वेळेवर चुकारे मिळत नाहीत. चाळणी, मालात होणारी अफरातफर, माल मोजण्यात होणारी दिरंगाई, चुकीच्या खात्यात पेमेंट जाणे, कमी पेमेंट येणे अशी अनेकविध कारणे आहेत.

ही खरेदी व्यवस्था भ्रष्टाचार करण्याचे केंद्र बनते आहे. निंबाजी लखाडे (खुदनापूर) म्हणाले, की नाफेड केंद्र म्हणजे सुविधा कमी, त्रास अधिक. पैसे वेळेवर मिळत नाहीत. हमाली दुप्पट आकारली जाते. शेवटी मालाची हेळसांड, नुकसान आणि चोरीच्या घटना याला शेतकरी कंटाळला असून मार्केटमध्ये १००, २०० रुपये कमी आले तरी चालेल संध्याकाळी पैसे नगदी मिळतात. सोयाबीन नाफेड केंद्र सुरू झाले तेव्हापासून हा ट्रेंड चालू आहे.

रमेश निकष (जानेफळ) म्हणाले, की बहुतेक सर्व हरभरा विकला गेला. दुसरे म्हणजे २०० रुपयांचा फरक आहे. नाफेडला हरभरा दिला तर एक क्विंटलमध्ये चारशे रुपये लो ग्रेड काढतात. लो ग्रेड, हमाली, भाडे, वेळ याचा विचार आणि हिशोब केला तर हरभरा नाफेडला देणे आजच्या भावात परवडत नाही.

हमीभाव खरेदीची स्थिती

नाफेडचे सुरू केंद्र ४५४

नाव नोंदणी ५१३५

खरेदी १५३ क्विंटल

‘एनसीसीएफ’चे केंद्र ५०

नोंदणी ९७३

खरेदी ७५ क्विंटल

एकूण नोंदणी ६१०८

हरभरा खरेदी २२८