Pune News : राज्यात रब्बीचा पेरा अतिशय वेगाने पुढे जात असून, शेतकऱ्यांनी गेल्या वर्षीच्या तुलनेत आतापर्यंत १४० टक्के पेरा केला आहे. यंदा एकूण पेरा सहा ते सात लाख हेक्टरने वाढण्याची शक्यता आहे, असे कृषी विभागाकडून सांगण्यात आले.

राज्यातील मोठ्या व मध्यम जलाशयांमध्ये यंदा पुरेसा साठा आहे. परतीचा मॉन्सूनदेखील लांबल्यामुळे काही प्रमाणात खरिपाला तडाखा बसला असला, तरी रब्बीसाठी पोषक स्थिती बनली आहे.

राज्यात गेल्या काही दिवसांपासून ढगाळ वातावरण असल्यामुळे मृदा आर्द्रता टिकून राहण्यास मदत होते आहे. त्यामुळेच यंदा रब्बीचा पेरा वाढणार आहे. राज्यात सरासरी ५४ लाख हेक्टरवर रब्बीची पिके घेतली जातात. चालू रब्बी हंगामात चार पेरा वाढून ६० लाख हेक्टरपर्यंत जाऊ शकतो, असा अंदाज कृषी विभागाचा आहे.

हरभरा, गहू, ज्वारी आणि मका अशी रब्बीमधील प्रमुख पिके असून, या पिकांचा पेरा गेल्या वर्षीच्या तुलनेत आतापर्यंत १०० टक्क्यांच्या पुढे गेला आहे. गेल्या वर्षीच्या रब्बीत शेतकऱ्यांनी नोव्हेंबरच्या पंधरवड्याअखेर १५ लाख हेक्टरवर पेरा केला होता. यंदा मात्र याच पंधरवड्यात पेरा २१ लाख हेक्टरपर्यंत आला आहे.

तसेच विशेष म्हणजे गव्हाचा पेरा गेल्या हंगामाच्या तुलनेत २६७ टक्क्यांपर्यंत झालेला आहे. गेल्या हंगामात शेतकऱ्यांनी याच कालावधीत ५२ हजार हेक्टरवर गहू पेरला होता. हाच पेरा सध्या दीड लाख हेक्टरपर्यंत गेला आहे. राज्याचे प्रमुख रब्बी पीक असलेला हरभरा गेल्या हंगामात याच कालावधीत साडेपाच लाख हेक्टरवर होता. सध्या तो वाढून साडेआठ लाख हेक्टरपर्यंत गेला आहे.