Pune News: शेतरस्त्यांचे पिढ्यान्‌पिढ्या सुरू असलेले वाद संपविण्यसाठी आणि प्रत्येक शेतशिवाराला रस्ता मिळण्यासाठी आता जिल्हा प्रशासनाच्या वतीने पाणंद रस्ते मोहीम हाती घेण्यात आली आहे. जिल्ह्यातील अनेक गावांत शेतकऱ्यांना शेतापर्यंत जाण्यासाठी रस्त्याअभावी अडचणी येतात, तर काही ठिकाणी पाणंद रस्ते, शेत रस्त्यांवर अतिक्रमणे झाली आहेत. आता हे रस्ते अतिक्रमणमुक्त करण्यात येणार आहेत.

पुढील तीन महिन्यांत जिल्ह्यातील शेतरस्ते खुले करण्यात येणार असून, त्यासाठी कृती आराखडा तयार करण्यात आला आहे. पाणंद, शेतरस्ते ग्रामस्थांच्या सहकार्याने तसेच सामंजस्याने खुले करण्यात येणार आहेत, असे जिल्हाधिकारी जितेंद्र डुडी यांनी सांगितले.

शेतीमधील कमी होणारी मनुष्यबळाची उपलब्धता लक्षात घेता शेतीची कामे करताना यंत्रांचा उपयोग वाढला आहे. यांत्रिकीकरणामुळे शेतीमध्ये पेरणी, आंतरमशागत, कापणी, मळणी व इतर कामे करण्यासाठी, यंत्रसामग्री शेतापर्यंत नेण्यासाठी आणि शेतीमाल बाजारात पोहोचविण्यासाठी बारमाही शेतरस्त्यांची आवश्यकता असते.

तसेच कुटुंबाचे विभाजन होत असल्याने शेतीचे देखील विभाजन होत आहे. त्यामुळे शेतीचे क्षेत्र कमी-कमी होत आहे. त्यामुळे शेतातून सुरू असलेली वहिवाट काही शेतकरी बंद करतात. त्यामुळे सर्व तालुक्यांमध्ये मोठ्या प्रमाणावर वहिवाट रस्ते, ग्रामीण रस्ते, खुले करण्याची प्रकरणे मोठ्या प्रमाणात प्रलंबित आहे. या सर्व पार्श्‍वभूमीवर असे रस्ते खुले करण्यासाठी कार्यपद्धती निश्चित करण्यात आली आहे.

...अशी आहे कार्यपद्धती

सुरुवातीला पाणंद रस्ते निश्चित करण्यासाठी तलाठी गाव नकाशे भूमिअभिलेख विभागाकडून उपलब्ध करून घेणार

तलाठी प्रत्यक्ष भेट देऊन बंद असलेल्या रस्त्यांची यादी तयार करणार

बंद असलेले रस्ते ज्या शेतकऱ्यांच्या शेतातून जातात, त्यांची यादी तयार करणार, असे रस्ते खुले करण्यासाठी सरपंच, शेतकरी यांची बैठक घेऊन समन्वयाने ते खुले करणार

काही ठिकाणी पोलिसांच्या साह्याने रस्ते खुले करणे