Parbhani News : परभणी जिल्ह्यातील शेतकऱ्यांना दिवाळीपू्र्वी अतिवृष्टीचे अनुदान तसेच २५ टक्के अग्रिम पीकविमा रक्कम अदा करावी. अन्यथा गावोगावी शेतकरी विधानसभा निवडणुकीवर बहिष्कार टाकतील, असा इशारा स्वाभिमानी शेतकरी संघटनेतर्फे देण्यात आला आहे. या संदर्भात जिल्हा प्रशासनाला संघटनेच्या वतीने निवेदन देण्यात आले आहे.

जिल्ह्यात अतिवृष्टीमुळे सोयाबीन, कापूस या पिकांचे मोठ्या प्रमाणात नुकसान झाले असून, उत्पादन निम्म्याने घटले आहे. त्यामुळे शेतकऱ्यांचा उत्पादन खर्चसुद्धा भरून निघत नाही. सोयाबीन, कापसाची हमीभावापेक्षा कमी भावाने खरेदी राजरोसपणे सुरू आहे.

जिल्हा प्रशासनाने अधिसूचना काढून शेतकऱ्यांच्या खात्यावर एकूण संभाव्य विमा रकमेपैकी २५ टक्के अग्रिम रक्कम जमा करण्याचे आदेश दिले. परंतु अद्याप शेतकऱ्यांच्या खात्यात विम्याची रक्कम जमा झालेली नाही. त्याचप्रमाणे अतिवृष्टीचे अनुदानदेखील खात्यात जमा झालेले नाही.

त्यामुळे आर्थिक अडचणीत सापडलेल्या शेतकऱ्यांना तत्काळ अतिवृष्टीचे अनुदान तसेच पीकविम्याची अग्रिम रक्कम दिवाळीपूर्वी देण्यात यावी, अन्यथा गावोगावी शेतकरी विधानसभा निवडणुकीच्या मतदानावर बहिष्कार टाकतील, असा इशारा स्वाभिमानी शेतकरी संघटनेच्या वतीने जिल्हाध्यक्ष किशोर ढगे, गजानन तुरे, मुंजा लोडे, माउली शिंदे, विठ्ठल चोखट, नामदेव काळे, सुदाम ढगे, राम गोळेगावकर यांनी प्रशासनाला दिलेल्या निवेदनाद्वारे दिला आहे.