Shirur News : मांडवगण फराटा येथे एका महिन्यात वंश सिंग व शिवतेज टेंभेकर या चिमुकल्यांचा बिबट्याच्या हल्ल्यात मृत्यू झाला. या दोन्ही घटना घडल्या त्यावेळी दोन्ही ठिकाणी महावितरणने वीजपुरवठा खंडित केला होता.

या घटनांमुळे परिसरातील शेतकरी आक्रमक झाले आहेत. महावितरणने शेतीपंपासाठी दिवसा वीज द्यावी, अशी मागणी निवेदनाद्वारे येथील शेतकऱ्यांनी केली आहे. महावितरणचे मांडवगण फराटा शाखा अभियंता इर्शाद शेख यांच्याकडे ग्रामस्थांनी निवेदन दिले.

शेतकऱ्यांनी दिलेल्या निवेदनात म्हटले आहे, की मांडवगण फराटा परिसरात गेल्या काही दिवसांपासून बिबट्याचे पाळीव प्राण्यांवर हल्ले होत आहेत. मांडवगण फराटा परिसरात गेल्या एक महिन्याच्या आत दोन चिमुकल्यांवर बिबट्याने हल्ला केल्याच्या घटना घडल्या आहेत. या घटना होत असताना परिसरातील वीजपुरवठा खंडित झाला होता.

शेतकऱ्यांना रात्रीच्या वेळी शेतात पाणी देण्यास जाणे अवघड झाले आहे. त्यामुळे शेतीपंपासाठी दिवसा वीज उपलब्ध करून द्यावी, घरगुती वीज ही २४ तास उपलब्ध करून द्यावी. आरडीएस योजनेतून येथे सिंगल फेज डीपी मंजूर करून द्यावे.

या वेळी सागर फराटे, मांडवगण सोसायटीचे माजी उपाध्यक्ष अमोल जगताप, संपत फराटे, पांडुरंग फराटे, गोरक्ष शितोळे, अंकुश जगताप, किरण फराटे, राजू कांबळे, महेश फराटे, चंद्रकांत लगड, मनोज फराटे, पोपट जगताप, संदीप शितोळे, अजित पवार, दिगंबर बोत्रे, ज्ञानदेव फरगडे, नवनाथ जाधव, अनिल शिंदे आदींसह शेतकरी उपस्थित होते.