Pune News : पशुखाद्याचे वाढलेले दर आणि दुधाचे कमी झालेले दर यामुळे पशुपालक शेतकरी मेटाकुटीला आला आहे. दुधाला प्रतिलिटर ४० रुपये दर रुपये दर मिळावा, या मागणीसाठी इंदापूर येथे आंदोलन करण्यात आले. या वेळी काही काळासाठी रास्ता रोको करीत दूध रस्त्यावर ओतून जोरदार घोषणाबाजी करीत सरकारचा निषेध व्यक्त करण्यात आला.

शहरातील मुख्य वर्दळीचा असलेल्या बाबा चौक येथे सकाळी ११ वाजता दूध उत्पादकांच्या वतीने कोसळलेल्या दूध दराच्या विरोधात आंदोलन करण्यात आले.

या वेळी आंदोलकांनी ‘कोण म्हणतो देत नाही, घेतल्याशिवाय राहत नाही,’ ‘दुधाला चाळीस रुपये प्रतिलिटरला दर मिळालाच पाहिजे,’ ‘या सरकारचे करायचे काय, खाली डोकं वर पाय’ अशा घोषणांनी परिसर दणाणून सोडला.

तसेच काही वेळासाठी बाबा चौकात जुना पुणे-सोलापूर मार्ग रोखून धरण्यात आला. यासह रस्त्यावर दूध ओतून देत सरकारच्या दुधाविषयीच्या धोरणांचा निषेध व्यक्त करीत दूध दरवाढ करण्याची मागणी केली.

दरम्यान, आंदोलन स्थळी इंदापूर पोलिस ठाण्याचे पोलिस निरीक्षक दिलीप पवार आणि मंडल अधिकारी एस. बी. हगारे यांनी निवेदन स्वीकारले त्यांनतर हे आंदोलन मागे घेण्यात आले.