Chhatrapati Sambhajinagar : गायीच्या दुधाला ४० रुपये व म्हशीच्या दुधाला प्रतिलिटर ६० रुपये दर द्यावा, या मागणीसाठी रयत क्रांती संघटनेच्या वतीने सोमवारी (ता. ११) पिरोळा फाटा (ता. सिल्लोड) येथे रास्ता रोको आंदोलन करण्यात आले.

या वेळी दूध उत्पादक शेतकऱ्यांनी दुधाच्या कॅन भरून रस्त्यावर दूध ओतून सरकारकडे दूर दरवाढीची मागणी केली. मागील काही दिवसांपासून राज्यभरात दूध दरवाढीसाठी शेतकरी आक्रमक झाले आहेत.

अनेक ठिकाणी आंदोलन सुरू आहेत. तरी सरकार शेतकऱ्यांच्या या मागणीकडे दुर्लक्ष करत आहे. सरकारने सरकारचे दूध दरवाढीच्या मागणीकडे लक्ष वेधून घेण्यासाठी रयत क्रांती संघटनेचे जिल्हाध्यक्ष प्रभाकर शेजुळ यांच्या नेतृत्वाखाली सोमवारी पिरोळा फाटा (ता. सिल्लोड) येथे आंदोलन करण्यात आले.

या वेळी दुग्धव्यवसाय शेतकरी कृष्णा शेजुळ, कल्पेश शेजुळ, अजय पारवे, काशिनाथ शेजुळ, विनोद शेजुळ, समाधान फुले, ज्ञानदेव मोठे, देवीदास जाधव, हरी शेजुळ उपस्थित होते. मंडल अधिकारी शंकर जैस्वाल, तलाठी श्रीमती गरुड यांना निवेदन देण्यात आले.

तर सिल्लोड ग्रामीण पोलीस स्टेशनचे सहायक पोलीस निरीक्षक सचिन क्षीरसागर यांनी फौज फाट्यासह बंदोबस्त ठेवला होता.