Wardha News : धोंडगाव शिवारात पट्टेदार वाघिणीच्या शावकाचा रस्ते अपघातात मृत्यू झाला. या घटनेची गंभीर दखल घेत आणि भविष्यात अशा घटना टाळता याव्यात, या हेतूने वनविभागाने संबंधित राज्य मार्गावर पाईकमारी ते गिरड हे क्षेत्र वाघ भ्रमण क्षेत्र जाहीर करीत ठिकठिकाणी सूचना फलक लावले आहे.

या भागात पट्टेदार वाघांचा संचार होत असलेल्या भागातून जात असले तरी काहीच मार्गांवर मानव व वन्यजीव संघर्ष टाळावा तसेच रस्ता अपघातात वन्यप्राण्यांचा नाहक बळी जाऊ नये, या हेतूने मार्गदर्शक सूचना फलक लावण्यात आले आहे.

२२ जानेवारीला समुद्रपूर-गिरड मार्गावरील धोंडगाव नजीक घडलेल्या घटनेची गंभीर दखल घेत वनविभागाने सार्वजनिक बांधकाम विभागाला ठोस उपाय करण्याची विनंती करणारे पत्र २४ जानेवारीला पाठविले.

या पत्राच्या अनुषंगाने वर्धा येथील बांधकाम विभाग वेळीच ठोस उपाययोजना करणार असून मानव, वन्यजीवांच्या सुरक्षेबाबत सकारात्मक असल्याचे सांगण्यात आले.

प्रति ताशी ८० किमी वेगमर्यादा असलेल्या या मार्गावर पूर्वी कुठेही वन्यजीवांच्या सुरक्षेच्या दृष्टीने सूचना फलक नव्हते. २२ जानेवारीला वाघिणीच्या शावकाचा मृत्यू झाला. याच घटनेची दखल घेत वनविभागाने या मार्गावर रात्रीला बॅरिकेटिंग करून सुसाट धावणाऱ्या वाहनांची गती कमी केली.