Pune News : भोर तालुक्यात मे महिन्यात झालेल्या मॉन्सूनपूर्व पावसामुळे उन्हाळी बागायती पिकांचे सुमारे १३०.६८ हेक्टर क्षेत्रावर नुकसान झाले आहे. शेतकऱ्यांना शासनाच्या आदेशानुसार २१ लाखांपर्यंत नुकसान भरपाई मिळणार असल्याची माहिती भोर तालुका कृषी अधिकारी शरद धमर्माधिकारी यांनी दिली.

भोर तालुक्यात ७ मे ते २९ मेपर्यंत मॉन्सूनपूर्व पाऊस सरासरीच्या ९०० टक्के झाल्याने शेतकऱ्यांच्या उन्हाळी पिकांचे मोठ्या प्रमाणात नुकसान झाले. काढणी योग्य भुईमूग, सोयाबीन, बाजरी, कांदा ही पिके पावसात भिजून, शेतात पाणी साचल्याने पिकांचे मोठ्या प्रमाणात नुकसान झाले.

शेतकऱ्यांचे वर्षभराचे मिळणारे बाजरी, शेंगदाणा तेल, जनावरांना मिळणारी पेंड, भुईमुगाचे टाळे (काड) यांच्या नुकसानीचा फटका शेतकऱ्यांना मोठा आहे. यामुळे शेतकऱ्याचे वर्षभराचे आर्थिक गणित कोलमडले आहे.

४६ गावांतील ३५२ शेतकऱ्यांचे नुकसान :

भोर तालुक्यातील ४६ गावांतील ३५२ शेतकऱ्यांचे नुकसान झाले आहे. यात भात ०.२० गुंठे, सोयाबीन २०.७३ हेक्टरी भुईमूग ५७. ८४ हेक्टर, बाजरी ९.०५ हेक्टर, ज्वारी १.९७ हेक्टर, इतर ३.२० हेक्टरचे नुकसान झाले असून २३ गावांतून १०९ शेतकऱ्यांचे भाजीपाला २४.०७ हेक्टर, फुले ०.१५ हेक्टर एवढे नुकसान झाले असून फळांमध्ये ११ गावांतून ३८ बाधित शेतकऱ्यांचे आंब्याचे १३.४७ हेक्टरवर नुकसान झाले असून एकूण ३३ टक्क्यांवर फळपिके सोडून जिरायतबाधित क्षेत्र ९२.९९ हेक्टर, बागायत बाधित क्षेत्र २४.२२ हेक्टर, फळपिकाखालील बांधित क्षेत्र १३.४७ हेक्टर, असे तालुक्यात एकूण ४९९ शेतकऱ्यांचे नुकसान झाले आहे.