Nashik News : लासलगाव विभाग सहकारी खरेदी विक्री संघाच्या पंचवार्षिक निवडणुकीत प्रगती पॅनेलचे नेते नानासाहेब पाटील यांच्या नेतृत्वाखालील प्रगती पॅनेलने सर्व १७ जागांवर निर्विवाद विजय मिळविला आहे. श्री.पाटील यांनी एक हाती सत्ता राखली आहे.

निवडणुकीसाठी एकूण ५३ उमेदवारांनी अर्ज दाखल केलेले होते. माघारीच्या अंतिम मुदतीपर्यंत जिवाबाई शिवाजी जाधव (महिला), निर्मला राजाराम मेमाणे (महिला), शंतनू नानासाहेब पाटील (इ. मा.), धोंडीराम त्र्यंबक धाकराव (अनु. जाती/जमाती ), शंकरराव किसनराव कुटे (भ. वि. जाती/जमाती) असे ५ उमेदवार बिनविरोध निवडून आले होते. उर्वरित १२ जागांसाठी निवडणूक प्रक्रिया पार पडली. निवडणूक निर्णय अधिकारी म्हणून वैभव मोरडे व सचिन काकडे यांनी कामकाज बघितले.

सर्वसाधारण वैयक्तिक सभासदांमधून १,९४५ मतदारांपैकी १,३४५ मतदान झाले. संस्था सभासद गटातून ३८ पैकी ३६ मतदान झाले. सर्वसाधारण मतदारसंघातून ११ जागांसाठी १२ उमेदवार रिंगणात होते. संस्था सभासद या मतदारसंघातून १ जागेसाठी २ उमेदवार रिंगणात होते.

श्री. नानासाहेब पाटील यांच्या नेतृत्वाखालील प्रगती पॅनलच्या उमेदवाराविरुद्ध कोळगाव येथील एक उमेदवार अशी लढत झाली. वैयक्तिक सभासद गटातून सर्वात जास्त मते राजाभाऊ बाबूराव दरेकर यांना मिळाली तर सर्वात कमी घोटेकर अनिल महिपत यांना मिळाली. दोन्ही मतदारसंघांमध्ये प्रगती पॅनेलचे सर्व १२ उमेदवार प्रचंड मताधिक्याने विजयी झाले.

सर्वसाधारण(वैयक्तिक सभासद) या मतदारसंघात एकूण १३४५ मतदान झाले. त्यातील उमेदवारांना मिळालेली मते अशी विलास नवनाथ आहेर (१२४३), प्रकाश कारभारी कापडी (१२४६), अनिल जगन्नाथ घोटेकर (१२२६), रंगनाथ महिपत घोटेकर (२५१) (पराभूत), जनार्दन राजाराम जगताप (१२४०), किशोर भास्करराव दरेकर (१२५५), राजाराम बाबूराव दरेकर (१२६१), राजाराम माधवराव दरेकर (१२४९), शांताराम संपतराव नागरे (१२१२), अरुण रामभाऊ बडवर (१२४१),सुरेश नथू रायते (१२४९), अनिल पोपट शिंदे (१२१०). संस्था सभासद मतदारसंघातील उमेदवारांची मते अशी नितीन केदारनाथ घोटेकर (२६, विजयी), रंगनाथ महिपत घोटेकर (१० पराभूत).