Washim News : शासनाने मध्यम व लघू प्रकल्पाची निर्मिती केली असून सिंचनाचा अनुशेष जवळजवळ भरून काढला आहे. परंतु त्या प्रमाणात शेतीसाठी लागणाऱ्या विजेची सुविधा निर्माण केली नसल्यामुळे या भागातील शेतकऱ्यांना सिंचनासाठी मोठी कसरत करावी लागत आहे. किमान १२ तास व दिवसा वीज देण्याची मागणी शेतकरी वर्गामधून केली जात आहे.

रब्बीच्या पेरण्या अंतिम टप्प्यात असून काही ठिकाणी रब्बीची पिके ताशी लागली असून त्यांना पाण्याची नितांत गरज निर्माण झाली आहे. शेतीला रात्री वीज पुरवठा केला जात आहे. त्यामुळे शेतकऱ्यांची डोकेदुखी वाढली आहे.

दिवसा वीजपुरवठा करण्याची मागणी शेतकरी करीत आहेत. शासनाने लघू व मध्यम प्रकल्पाची निर्मिती करून सिंचनाचा अनुशेष जवळजवळ भरून काढला असला तरी त्या प्रमाणात शेतकऱ्यांना विजेची सुविधा उपलब्ध करून दिली नाही. त्यामुळे शेतकऱ्यांना अनेक समस्यांचा सामना करावा लागतो.

या वर्षी पावसाळा भरपूर प्रमाणात झाल्यामुळे पाणीपातळीत वाढ झाली असल्यामुळे मोठ्या प्रमाणात पाणीसाठा उपलब्ध आहे. परतीचा पाऊस कुठे कमी तर कुठे अधिक पडल्यामुळे रब्बीच्या पेरण्या मागे पुढे झाल्या आहेत. गहू, हरभरा, करडई, मका, ज्वारी, चिया सीड्स ही रब्बीतील प्रमुख पिके आहेत.

या पिकांच्या पेरण्या आटोपल्या असून ही पिके ताशी लागली आहेत. रब्बी पिकांसाठी पाणीसाठा आहे. परंतु, दरवर्षीप्रमाणे याही वर्षी रब्बी हंगामाच्या सुरुवातीला विजेची समस्या कायमच आहे. रब्बी हंगामातही शेतीला केवळ आठ तास वीजपुरवठा केला जातो.

रात्रीला वीजपुरवठा केला जात असल्यामुळे शेतकऱ्यांना अनेक समस्यांचा सामना करावा लागतो. शेतीला किमान बारा तास व दिवसा विजपुरवठा देण्यात यावा अशी मागणी शेतकरी वर्गामधून केली जात आहे.