Nashik Market Committee News : सटाणा तालुक्यातील नामपूर बाजार समितीमध्ये विविध पदांसाठी सुरू असलेल्या कथित नोकर भरती प्रकियेला जिल्हा निबंधक एस. वाय. पुरी यांनी स्थगिती दिल्याने एकच खळबळ उडाली.

याबाबत खुद्द बाजार समितीचे सभापती कृष्णा भामरे यांनी सहकारमंत्री, पणन संचालक, जिल्हा निबंधक यांच्याकडे लेखी तक्रार केल्याने सहकार खात्याने नोकर भरतीला स्थगिती दिली.

बाजार समितीच्या संचालक मंडळाच्या मनमानी कारभाराला सहकार खात्याने स्थगिती देऊन चाप लावला. याबाबत पणन संचालक काय कारवाई करतात, याकडे सर्वांचे लक्ष लागले आहे.

बाजार समितीमधील नोकर भरती प्रक्रिया सुरुवातीपासून संशयाच्या फेऱ्यात सापडली आहे. विद्यमान संचालक मंडळाकडून ‘अर्थपूर्ण’ घडामोडीतून कंत्राटी कर्मचाऱ्यांना कायम करण्यासाठी भरती प्रक्रिया राबविली जात आहे.

यामुळे मोसम खोऱ्यातील बेरोजगार शेतकरी तरुणांवर अन्याय होणार आहे. त्यामुळे सदर भरती प्रक्रिया तत्काळ रद्द करावी, अशी मागणी बाजार समितीचे सभापती, प्रगतिशील शेतकरी कृष्णा भामरे यांनी केली आहे.

नामपूर कृषी उत्पन्न बाजार समितीत कार्यालयीन कामकाजासाठी कॉम्प्युटर ऑपरेटर, कनिष्ठ लिपिक, हेड वॉचमन, शिपाई, वॉचमन, वॉटरमन आदी १६ पदांसाठी भरती प्रक्रिया सुरू आहे.

या प्रक्रियेत होत असणाऱ्या कामकाजामध्ये विद्यमान संचालक मंडळातील काही संचालकांचे नातेवाईक यांना नियमबाह्य पद्धतीने सदर प्रक्रियेत नोकरीत पात्र ठरवून रिक्त जागांवर संचालकांच्या नातेवाईकांना नियुक्त करण्याचा घाट घातला जात आहे.

भरती प्रक्रियेमध्ये सर्व जागांवर यापूर्वी रोजंदारीने काम करणारे कर्मचारी नियुक्त केले जाणार आहेत. रोजंदारी कर्मचाऱ्यांची यादीही निवेदनासोबत जोडल्याचे सभापती भामरे यांनी सांगितले.

भरती प्रक्रिया ही जनतेच्या व शासनाच्या डोळ्यात धूळफेक करणारी असून यामुळे शेतकऱ्यांच्या घामाच्या कोट्यवधी रुपयांची उधळपट्टी होणार आहे.

सध्या कार्यरत असलेले रोजंदारीवर काम करणारे कर्मचारी दोन ते तीन वर्षांपासून कार्यरत असून नंतर नियमाप्रमाणे शासनाच्या वेगवेगळ्या परवानग्या घेऊन सदर रिक्त पदांची जाहिरात संचालक मंडळाच्या सोयीनुसार वृत्तपत्रात प्रसिद्ध करण्यात आली आहे.

या रिक्त पदांच्या भरतीसाठी सहकार प्रशिक्षण केंद्र नाशिक या संस्थेबरोबर पदभरती प्रक्रिया राबविण्याचा करारनामा करण्यात आला आहे. रिक्त पदांवर अनेक पात्र उमेदवारांनी अर्ज केले असून

त्यांची परीक्षा नाममात्र पद्धतीने घेण्यात आली आहे. अशा भ्रष्ट पद्धतीने होत असलेल्या पदभरती प्रक्रियेमुळे परिसरातील शेतकऱ्यांचे हुशार, पात्र मुले नोकरीपासून वंचित राहण्याची दाट शक्यता आहे. त्यामुळे भरती प्रक्रिया रद्द करण्याची मागणी शेतकऱ्यांकडून होत आहे.