Nashik News : कांद्याला अपेक्षित दर मिळत नसल्याने गेल्या पंधरा दिवसांपूर्वी शेतकरी संघटनेने कृषीमंत्री माणिकराव कोकाटे यांच्या दारात कांदा ओतण्याचा इशारा दिला होता. या पार्श्‍वभूमीवर कृषिमंत्री माणिकराव कोकाटे यांनी शुक्रवारी (ता. ६) शेतकरी संघटनेच्या शिष्टमंडळाची सटाणा येथील शासकीय विश्रामगृहावर भेट घेतली.

या वेळी शेतकरी संघटनेच्या कार्यकर्त्यांनी मॉन्सूनपूर्व पावसामुळे नुकसान झालेल्या शेतीमालाचे पंचनामे करून तत्काळ मदत जाहीर करावी, कांद्यासाठी भावांतर योजनेची मागणी केली.

मॉन्सूनपूर्व पावसामुळे उभ्या व साठवलेल्या शेतीमालाचे नुकसान झालेले आहे. यातच उन्हाळ कांदा पिकाला उत्पादन खर्च इतका दर मिळत नसल्याने शेतकरी हवालदिल झाले आहेत. या पार्श्‍वभूमीवर शेतकरी संघटनेच्या पदाधिकाऱ्यांनी कृषिमंत्री कोकाटे यांच्याकडे भेटीदरम्यान शेतीप्रश्नांवर चर्चा करत विविध मागण्या केल्या आहेत. गेल्या तीन महिन्यांपासून शेतकरी स्वस्त दरात कांदा विक्री करत आहेत.

त्यामुळे विक्री केलेल्या कांद्याला सरासरी ३ हजार रुपये प्रतिक्विंटल दर गृहीत धरून राज्य सरकारने भावांतर योजना लागू करावी. १ जूनपासून सरकारने ३ हजार रुपये क्विंटल दराने कांदा खरेदी सुरू करावी. जास्तीत जास्त कांदा निर्यात होण्यासाठी निर्यातदारांना वाहतूक अनुदान द्यावे, अशा मागण्या निवेदनाद्वारे करण्यात आल्या आहेत.

या वेळी शेतकरी संघटनेचे केशव सूर्यवंशी, भास्कर बागुल, नयन सोनवणे, महेंद्र जाधव, भिका सूर्यवंशी, त्रंबक जाधव, देविदास अहिरे, राकेश अहिरे, संदीप सोनवणे, सुनील बिरारी, प्रवीण जाधव, प्रवीण सोनवणे, भालचंद्र वाघ, सूरज जाधव, यशवंत गुंजाळ, अविनाश जाधव, रूपेश जाधव आदी उपस्थित होते.

भावांतर योजनेसाठी सरकारकडे मागणी करणार : कृषिमंत्री

भावांतर योजनेसाठी सरकारकडे मागणी करणार तसेच काढणीपश्चात पोळ मारलेल्या कांद्याचे पंचनामे करावेत, अशा सूचना बागलाण तालुक्यातील अधिकाऱ्यांना केल्या. तसेच लवकरात लवकर नुकसानीचे पंचनामे करून मदत जाहीर करू, असे आश्वासन कृषिमंत्री माणिकराव कोकाटे यांनी दिले. तसेच इतर सर्व मागण्यांवर सकारात्मक उत्तरे मिळाल्याची माहिती शेतकरी संघटनेचे केशव सूर्यवंशी यांनी दिली.