Ahilyanagar News : पंतप्रधान कृषी सिंचन योजना पाणलोट विकास घटक २.० या प्रकल्पात मोठ्या प्रमाणात झालेली शेततळी शेतकऱ्यांना निश्चितच वरदान ठरणार आहेत. प्रकल्पाचा कालावधी जरी संपत आलेला असला तरी खरे काम हा प्रकल्प संपल्यानंतरच सुरू होणार आहे. आदिवासी समुदाय विकासाच्या मुख्य प्रवाहात आला पाहिजे, त्यासाठी त्यांना सामावून घ्यावे, असे आवाहन आमदार डॉ. किरण लहामटे यांनी व्यक्त केले.

अकोले तालुक्यातील कोहणे, विहीर, तळे, शिंदे, कोथळे, वागदरी, लव्हाळी ओतूर, लव्हाळी कोतुळ, पाचनई या गावांत पंतप्रधान कृषी सिंचन योजना पाणलोट विकास घटक २.० अंतर्गत पाणलोट राबवला जात आहे.

पाचनई येथे पाणलोट यात्रेचा प्रारंभ आमदार लहामटे यांच्या हस्ते झाला. पर्यटन तज्ज्ञ डॉ. विशाल लाहोटी, प्रकल्प कार्यान्वयिन यंत्रणा प्रमुख किरण मांगडे, राजाराम साबळे, उपविभागीय कृषी अधिकारी विलास गायकवाड, तालुका कृषी अधिकारी सचिन गिरी, सरपंच भास्कर बादड,

कृषी सहायक तेजश्री कोरडे, उपविभागीय जलसंधारण अधिकारी कपिल बिडगर, गोविंद कुल्लाळ, बाळासाहेब बांबळे, नारायण घुले, बाळनाथ सोनवणे आदी उपस्थित होते. नागरिकांना जलसंधारण शपथ दिली. प्रास्ताविक किरण मांगडे यांनी केले. राजाराम साबळे यांनी आभार मानले.

पंतप्रधान कृषी सिंचन योजना पाणलोट विकास घटक प्रकल्पातून अकोले तालुक्यातील नऊ गावांत जलसंधारण उपक्रम राबवला आहे. दोन वर्षांत ९ गावांत १६३ शेततळी पूर्ण झाली. या वर्षातही अधिक कामे पूर्ण करून शेतकऱ्यांना त्याचा फायदा होईल.

- किरण मांगडे, प्रकल्प कार्यान्वयीन यंत्रणा प्रमुख