Akola News : केळी पिकाच्या गुणवत्तायुक्त घड निर्मितीसाठी केळीची लागवड उती संवर्धित रोपापासून करणे, रोपांच्या निवडीचे निकष, केळीच्या उत्पादनक्षम वाणांची निवड, जमीन तयार करून गादीवाफ्यावर रोपांची लागवड, पांढऱ्या मुळांची योग्य वाढ होण्यासाठी दुहेरी ठिबक नळ्यांचा वापर आवश्‍यक आहे, असे प्रतिपादन उद्यानविद्या विषय विशेषज्ज्ञ गजानन तुपकर यांनी केले.

अकोला कृषी विज्ञान केंद्र आणि अकोट कृषी तंत्रज्ञान व्यवस्थापन यंत्रणेच्या संयुक्त विद्यमाने ‘दर्जेदार केळी उत्पादन आणि कीड-रोग व्यवस्थापन तंत्र’ या विषयावर प्रशिक्षण घेण्यात आले.

या वेळी श्री. तुपकर बोलत होते. जिल्ह्यात केळी पिकाखाली संत्रा पाठोपाठ मोठे क्षेत्र असून अकोट, तेल्हारा आणि बार्शीटाकळी तालुक्यांमध्ये केळी मोठ्या प्रमाणावर लागवड केली जाते. हे लक्षात घेता हे प्रशिक्षण आयोजित केले होते.

श्री. तुपकर म्हणाले, की अन्नद्रव्य व्यवस्थापनाबाबत मार्गदर्शन करताना खतांचे बेसल डोस तसेच विद्राव्य खतांचे महिनावार वेळापत्रक, सिंचन व्यवस्थापन, घड व्यवस्थापन करताना ९ ते १० फण्या ठेवून विरळणी करणे, निर्यातक्षम घड निर्मितीसाठी घड पिशव्यांनी झाकणे, घड फुगवणसाठी संजीवकांचा वापर इत्यादी अनेक पैलूंवर मार्गदर्शन केले.

पीक संरक्षण तज्ज्ञ डॉ. चारुदत्त ठिपसे यांनी केळी पिकांवरील महत्त्वाच्या किडी आणि रोगांबाबत माहिती दिली. कार्यक्रम सहायक दुष्यंत देशमुख यांनी केळी पिकामध्ये माती आणि पाणी परीक्षण कसे करावे, या विषयी सांगितले. कार्यक्रमाचे सूत्रसंचालन राहुल अडाणी यांनी केले.