Nagpur News : राज्य सरकारी कर्मचाऱ्यांच्या सेवानिवृत्ती वेतनासंदर्भात एक समिती नेमली आहे. त्यानुसार कर्मचाऱ्यांना पेन्शन देण्यात येईल, असे सांगून उपमुख्यमंत्री देवेंद्र फडणीस यांनी संप मागे घेतल्याबद्दल सर्व संघटना आणि सरकारी कर्मचाऱ्यांचे आभार मानले. संवादातूनच मार्ग निघत असतो आणि तो संवाद आम्ही केला, असेही ते म्हणाले.

नागपूर येथे माध्यम प्रतिनिधींनी प्रतिक्रिया विचारली असता ते बोलत होते. फडणवीस म्हणाले, की शासकीय कर्मचाऱ्यांनी संप मागे घेतला, ही आनंदाची बाब आहे. सोमवारी (ता. २०) दुपारी माझी मुख्यमंत्री एकनाथ शिंदे यांच्याशी चर्चा झाली होती.

आम्ही कुठलाही अहंभाव न बाळगता कर्मचाऱ्यांची भूमिका जाणून घेतली. आडमुठी भूमिका कधीच घेतली नाही. आम्ही सरकारी कर्मचाऱ्यांचे हित पाहणारेच आहोत. सामाजिक सुरक्षेची भूमिका तत्त्व म्हणून आम्ही आधीच मान्य केली होती.

आता चर्चेचे मुद्दे निश्चित करून समितीपुढे ठेवण्यात आले आहेत. समिती त्यावर निर्णय घेईल. पहिल्या दिवशीपासूनच आम्ही संवादाचा प्रयत्न करीत होतो.

आज त्यांनी संप मागे घेतला, याचा आनंद आहे. समितीला तीन महिन्यांचा कालावधी दिलेला आहे. त्यामुळे कालबद्ध वेळेतच समिती आपला अहवाल देईल.

सामाजिक सुरक्षितता, सेवानिवृत्तीनंतर जे लाभ त्यांना हवे आहे, त्या संदर्भातील तत्त्व आम्ही मान्य केले आहे. आता त्याची अंमलबजावणी कशी करायची या संदर्भात ही समिती काम करणार आहे.

आम्ही पहिल्याच दिवशी कर्मचाऱ्यांना सांगितले होते, की जो समितीचा अहवाल असेल त्यामध्ये आपण कुणालाही वगळणार नाही. सर्वांना सोबत घेऊनच आपल्याला चालायचे आहे. त्यामुळे समितीने घेतलेला निर्णय सर्वांना लागू होईल, असा विश्वासही त्यांनी बोलून दाखविला.