Akola News : डॉ. पंजाबराव देशमुख कृषी विद्यापीठाच्या वतीने मार्च-एप्रिल २०२५ या दोन महिन्यांसाठी आयडॉल जाहीर करण्यात आले आहेत. शेतकरी गटात विमलादेवी वाघूजी गेडाम यांना ‘शेतकरी आयडॉल’ तर, डॉ. मोहन बेलगमवार यांना ‘कृषी पदवीधर आयडॉल’ म्हणून जाहीर करण्यात आले.

कृषी विद्यापीठाच्या आणि इतर समांतर संस्थांच्या सहयोगातून स्वतः व्यावसायिक शेती साकारणाऱ्या आणि सोबत इतरांना मार्गदर्शक ठरलेल्या विदर्भातील शेतकऱ्यांचा कार्य परिचय इतरांना होण्याच्या उद्देशाने विद्यापीठातर्फे ‘आयडॉल’ निवडले जातात. निवड केलेल्यांचा परिचय देण्यासाठी त्यांचे होर्डिंग विदर्भातील जिल्ह्यात विद्यापीठाच्या प्रक्षेत्रांवर लावण्यात येत असतात.

कृषी अभ्यासक्रम पूर्ण करीत त्याचा व्यावसायिक वापर करून स्वतः कृषी उद्योजक, निर्माता, मार्गदर्शक, शास्त्रीय दृष्टिकोनातून परिपूर्ण व्यावसायिक शेती करीत आहेत आणि इतरांनाही मार्गदर्शक ठरले, अशांची ‘कृषी पदवीधर आयडॉल’म्हणून निवड केली जाते.

राजुरा (जि. चंद्रपूर) येथील विमलादेवी वाघूजी गेडाम यावेळी ‘शेतकरी आयडॉल’ ठरल्या. त्यांनी शेतीत उल्लेखनिय कामे केली आहेत. सूक्ष्म माती परीक्षण, सेंद्रिय निविष्ठांचा वापर, सूक्ष्म सिंचन पद्धती, विविध पीक पद्धतीसह त्या इतर उपक्रमात सक्रीय आहेत.

तर डॉ. मोहन बेलगमवार हे एमएससी ॲग्री झालेले असून पुण्यात एका कंपनीचे संस्थापक आहेत. शेती उपयुक्त सेंद्रीय कृषी उत्पादीत करून विविध राज्यात विपणन करीत असतात. त्यांच्या कार्याची दखल घेत ‘कृषी पदवीधर आयडॉल’ म्हणून निवडण्यात आले.

विदर्भातील ज्या शेतकऱ्यांनी स्वतः शेती करताना इतरांसाठी प्रेरक म्हणून कार्य केले आहे तथा कृषी विद्यापीठाच्या संपर्कातून अत्याधुनिक कृषी तंत्रज्ञानाचा अवलंब केला. त्यांनी संबंधित जिल्ह्यातील कृषी विज्ञान केंद्र अथवा विद्यापीठाच्या अकोला येथील शिक्षण विस्तार संचालकांसोबत संपर्क साधून आपल्या ज्ञानाचा आणि अनुभवाचा फायदा इतर शेतकऱ्यांना करून द्यावा. त्यांच्या कार्याची नोंद घेऊन त्यांना देखील ‘आयडॉल’ म्हणून सन्मान करता येईल, असे आवाहन शिक्षण विस्तार संचालक डॉ.धनराज उंदीरवाडे यांनी केले आहे.