Parbhani News : जिल्ह्यातील आमडापूर (ता. परभणी) येथील श्री लक्ष्मी नृसिंह शुगर्सकडील थकित ‘एफआरपी’ दिल्याशिवाय कारखाना चालू देणार नाही, असा इशारा भारतीय जनता पक्षाचे जिल्हा सरचिटणीस (ग्रामीण) विलास बाबर यांनी नांदेड येथील विभागीय साखर सहसंचालकांना दिलेल्या निवेदनाद्वारे दिला आहे.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

बाबर यांनी निवेदनात म्हटले आहे, की इथेनॉलसाठी साखर वळविलेल्या साखर कारखान्यांनी उतारा प्रमाणीकरण केलेले नाही. २०२३-२४ च्या हंगामातील दर निश्‍चित न करता परभणी जिल्ह्यात कारखाने सुरू करण्याची तयारी सुरू आहे. हे थांबवून उसाचा भाव जाहीर करावा.

२८ मार्च २०२३ रोजी एफआरपीकरिता शेतकरी कारखान्यावर ठिय्या आंदोलनास बसले होते, त्या वेळी कारखान्याचे संचालक संजय धनकवडे व प्रमोद जाधव यांनी ३० एप्रिल २०२३ पर्यंत गाळप झालेल्या सर्व उसाचे प्रतिटन २३०० रुपयेप्रमाणे पैसे देण्याचे व संपूर्ण थकित एफआरपी १० मे २०२३ पर्यंत अदा करण्याचे लेखी आश्‍वासन दिले. तरीही थकित एफआरपी अद्याप दिलेली नाही.

उलट वस्तुस्थितीला अनुसरून अथवा प्रामाणिकपणे उतारा प्रमाणीकरण न करता उतारा कमी दाखवून (१०.४२ टक्के), तोडणी व वाहतूक खर्च वाढवून (८०७ रुपये), एफआरपी कमी दाखवून शेतकऱ्यांची आर्थिक लूट केली आहे. जिल्ह्यातील देवनांद्रा (ता. पाथरी) व कानडखेड (ता. पूर्णा) येथील कारखान्यांनी उसाला दिलेला दर किमान श्री लक्ष्मी नृसिंहने द्यावा, अन्यथा गाळप थांबवू, याची नोंद घ्यावी, असा इशारा विलास बाबर यांनी दिला. या वेळी उद्धव खिल्लारे आदी उपस्थित होते.