Chhatrapati Sambhajinagar : जुन्या पेन्शन योजनेसाठी मंगळवारपासून (ता. १४) पुकारण्यात आलेल्या बेमुदत संपात प्रशासनाच्या कृषी, महसूलसह विविध विभागातील तसेच जिल्हा परिषदेच्या कर्मचाऱ्यांनी सहभाग नोंदविला. त्यामुळे अनेक विभागातील कामे खोळंबली तर कार्यालयात शुकशुकाट पाहायला मिळाला.

नव्या योजनेद्वारे दिले जाणारे निवृत्तिवेतन अत्यंत तुकडे आहे. त्यात वृद्धापकाळातील चरितार्थ भागविणे अवघड आहे.

त्यामुळे शेवटच्या वेतनाच्या निम्म्या रकमेची तरतूद असलेली १९८२ सालची जुनी पेन्शन योजना लागू करण्याच्या मागणीसाठी मंगळवारपासून बेमुदत संप पुकारण्यात आला आहे.

यासंदर्भात महाराष्ट्र राज्य कृषी सहायक संघटनेने १२ मार्चला कृषी आयुक्तांना निवेदन पाठवून संघटना संपात सहभागी होत असल्याचे कळविले होते, अशी माहिती संघटनेचे सरचिटणीस शिवानंद आडे यांनी दिली.

त्यानुसार कृषी विभागातील वर्ग तीन व चारचे कर्मचारी मंगळवारी संपात सहभागी झाले. महसूल आयुक्तालय, जिल्हाधिकारी कार्यालय, जिल्हा परिषद आदी ठिकाणी जमलेल्या कर्मचाऱ्यांनी आपल्या मागण्यांसाठी जोरदार घोषणाबाजी केली.