Parbhani News : खरीप २०२४ मधील मूग, उडीद, ज्वारी, बाजरी या पिकाच्या नुकसानीबद्दल पंतप्रधान पीकविमा योजनेअंतर्गत व्यापक प्रसारित स्थानिक नैसर्गिक आपत्ती (वाइड स्प्रेड लोकल कॅलेमिटी-डब्ल्यू.एस.एल.) या जोखीमबाबी अंतर्गत परभणी जिल्ह्यातील २५ हजार ३७७ शेतकऱ्यांना २ कोटी ६९ लाख रुपये एवढा पीकविमा मंजूर आहे.

आजवर २३ हजार ६५१ शेतकऱ्यांच्या खात्यावर पीकविम्याची २ कोटी ४८ लाख रुपये रक्कम जमा करण्यात आली आहे. दरम्यान, खरीप २०२४ मध्ये विविध जोखीम बाबीअंतर्गत ७ लाख ४४ हजार ५२१ शेतकऱ्यांना ४०५ कोटी ९९ लाख रुपये विमा वाटप झाले, आहे अशी माहिती कृषी विभागाच्या सूत्रांनी दिली.

व्यापक (सर्वदूर) प्रसारित स्थानिक आपत्ती अंतर्गत जिल्ह्यातील सर्व नऊ तालुक्यांतील ७ हजार ६३४ हेक्टरवरील पिके बाधित आहेत. त्यात ५१ मंडलांतील ५ हजार ३९७ हेक्टर मूग, ४५ मंडलांतील २ हजार ७२७ हेक्टर उडीद, ४३ मंडलांतील ६९३.९६ हेक्टर ज्वारी, ३४ मंडलांतील ६३.५७ हेक्टर बाजरी या पिकांचा समावेश आहे. या पिकांसाठी विमासंरक्षण घेतलेल्या व नुकसानीची तक्रार दाखल केलेल्या विमा मंजूर करण्यात आला.

४३० कोटी ८७ लाख रुपये पीकविमा

परभणी जिल्ह्यात खरीप २०२४ मध्ये विविध जोखीमबाबीअंतर्गत ७ लाख ५७ हजार ८२१ शेतकऱ्यांना ४३० कोटी ८७ लाख रुपये पीकविमा मंजूर आहे.

त्यात मध्य हंगाम प्रतिकूल परिस्थिती (मिड-सीझन अॅडव्हर्सिटी) अंतर्गत सोयाबीन, कपाशी, तूर पिकांसाठी २९९ कोटी २३ लाख रुपये २५ टक्के मर्यादेत अग्रिम विमा, स्थानिक नैसर्गिक आपत्ती (लोकल नॅचरल कॅलेमिटीज -एल.सी.) अंतर्गत १०४ कोटी ७७ लाख रुपये, काढणीपश्‍चात नुकसान (पोस्ट हार्वेस्टिग ः पी. एच.)अंतर्गत २४ कोटी १८ लाख रुपये, व्यापक प्रसारित स्थानिक आपत्ती (वाइड स्प्रेड लोकल कॅलेमिटीज) अंतर्गत २ कोटी ६९ लाख रुपये विमा भरपाईचा समावेश आहे. एकूण मंजूर ४३० कोटी ८७ लाख रुपये पैकी ४०५ कोटी ९९ लाख रुपये विम्याचे वाटप झाले आहे. राज्य शासनाच्या हिश्‍शाचा दुसरा विमा हप्ता थकित असल्यामुळे काढणी पश्‍चात नुकसान अंतर्गत २४ कोटी १८ लाख रुपये पीकविमा प्रलंबित आहे.