Palghar News : डहाणू तालुक्यात भातकापणीला सुरुवात झाली आहे. तालुक्यातील अनेक शेतकरी भातकापणीच्या कामात व्यग्र आहेत. यंदा परतीच्या पावसामुळे पिकाचे मोठे नुकसान झाले असले, तरी सध्या गरवे भातपीक चांगल्या स्थितीत आहे, असे शेतकरी सांगत आहेत. त्यामुळे कापणीला वेग आला आहे. मजुरांची कमतरता असल्याने कुटुंबीय एकत्र कापणी करत आहेत.

डहाणू व तलासरी तालुक्यात मोठ्या प्रमाणात भातशेती होते. येथील आदिवासी कुटुंबांचे जीवन याच शेतीवर अवलंबून आहे. पारंपरिक पद्धतीने कापणी करून पुढे भाजीपाला व कडधान्यांचे उत्पादन घेणाऱ्या शेतकऱ्यांना यंदा मजुरांची मोठी समस्या जाणवत आहे.

कापणीसाठी मजूर कमी मिळत असल्याने घरातील सदस्य आणि सध्या दिवाळीच्या सुट्या लागल्याने शाळकरी मुलेही कापणीच्या कामात हातभार लावत आहेत. शेतीमधून मिळणाऱ्या उत्पादनावरच आदिवासी शेतकऱ्यांचे कुटुंबीय उदरनिर्वाह करतात.

राज्य महामंडळाद्वारे दरवर्षी भाताची खरेदी किंमत मिळत असल्याने हे शेतकरी कुटुंबाचा पालन-पोषण व मुलांचे शिक्षण चालवतात. मात्र, परतीच्या पावसामुळे कापणीला उशीर झाला. त्यामुळे झोडणीही लांबणार आहे. त्यामुळे पावलीही विकू शकणार नाहीत. परिणामी, यंदाच्या दिवाळीला मंदीचे वातावरण असेल, असे शेतकऱ्यांचे मत आहे.