Chandrapur News : नैसर्गिक आपत्तीत नुकसान होत असल्याने पीकविमा हा एक पर्याय शेतकऱ्यांसमोर आहे. मात्र पिकाचा विमा काढला तरी भरपाई वेळेत मिळतच नाही. असाच अनुभव भात उत्पादक शेतकऱ्यांना आला आहे. पात्र शेतकरी गेल्या वर्षीच्या पीकविम्याच्या प्रतीक्षेत आहेत.

मूल तालुक्यात मोठ्या प्रमाणात धानाचे उत्पादन घेतले जाते. कापूस, सोयाबीन लागवडीखालील क्षेत्रही बरेच आहे. मात्र बदलत्या हवामानाचा धान उत्पादक शेतकऱ्यांना नैसर्गिक संकटाचा मोठा फटका बसत आहे. अवकाळी पाऊस पडणे यासह अन्य कारणांमुळे उत्पन्नावर परिणाम होत आहे. पिकाच्या नुकसानीला रोखण्यासाठी पीकविमा उतरविण्याचे आवाहन शासनाने केले होते.

त्यानुसार तालुक्यातील धान उत्पादक शेतकऱ्यांनी भारतीय कृषी विमा कंपनीकडून विमा काढला. मात्र, तालुक्यातील नुकसानग्रस्त धान उत्पादकांना अद्याप पीकविमा मिळाला नाही. तालुक्यातील शेतकरी पीक विम्याच्या प्रतीक्षेत आहेत.

पीकविमा कपनीला पैसेही उपलब्ध झाले आहेत. आनंदाचा दिवाळी सण असताना शेतकरी आर्थिक अडचणीत आहेत. शेतकऱ्यांची होत असलेली गैरसोय लक्षात घेता पात्र शेतकऱ्यांना पीकविमा कंपनीने पीकविमा रक्कम देण्यात यावी, अशी मागणी शेतकऱ्यांनी केली आहे.