Nagar News : नगर जिल्ह्यात गतवर्षी झालेल्या अपुऱ्या पावसाचे परिणाम आता दिसू लागले आहेत. सध्या जिल्ह्यातील धरणात एकूण साठवण क्षमतेच्या केवळ सत्तावीस टक्के पाणीसाठा उपलब्ध आहे. त्यातही उत्तर नगर जिल्ह्यातच अधिक पाणी उपलब्ध असून, दक्षिण नगर जिल्ह्यात दुष्काळाच्या तीव्र झळा बसू लागल्या आहेत. भंडारदरा, निळवंडे धरणाचे पोट खपाटीला गेले आहे.
राज्यात क्षेत्रफळाने मोठा असलेल्या नगर जिल्ह्यात मुळा, भंडारदरा, निळवंड ही तीन मोठ्या धरणासह मुसळवाडी, टाकळीभान येथील मध्यम प्रकल्प आहेत. आढळा, घोड, मांडओहळ, घाटशीळ पारगाव, सीना, खैरी, विसापुर ही धरणे दक्षिण नगर जिल्ह्यात आहेत. उत्तर भागाच्या तुलनेने दक्षिणेत प्रकल्पाची संख्या अधिक आहे, मात्र उत्तरेतील मोठ्या धरणामुळे सत्तर टक्के पाणीसाठा उत्तर भागात होतो.
गेल्यावर्षी पावसाळ्यात नगर जिल्ह्यात पुरेसा पाऊस झाला नाही. भंडारदरा, निळवंडे धरणे भरली, मात्र मुळा भरले नाही. शिवाय दक्षिणेतील बहुतांश मध्यम, लघू प्रकल्प भरले नाही. त्याचा परिणाम पाणीसाठ्यावर झाला. भंडारदरा, निळवंडे, मुळाच्या लाभक्षेत्रातील शेतकऱ्यांना शेतीसाठी पाण्याचा लाभ मिळाला, मात्र उत्तरेत यंदा दुष्काळाची तीव्रता अधिक आहे. निळवंडे धरणातून यंदा पाणी सोडल्यामुळे निळंवडे धरणात केवळ ११ टक्के म्हणजे एक टीएमसी पाणी आहे. गेल्या वर्षी या धरणात पावणेचार टीएमसी म्हणजे ४४ टक्के पाणी साठा होता.
भंडारदरा धरणातही सध्या केवळ साडेचार टीएमसी म्हणजे ४४ टक्के पाणीसाठा आहे. गेल्यावर्षी या धरणात साडेआठ टीएमसी म्हणजे ८८ टक्के पाणी होते. मुळा धरणात सध्या १२ टीएमसी एकूण पाणी असून पावणे आठ टीएमसी उपयुक्त पाणी आहे. उपयुक्त उपलब्ध पाण्याची टक्केवारी ३४ टक्के आहे. गेल्या वर्षी ही टक्केवारी ५६ टक्के होती. घोड धरणात एक टीएमसी पाणी आहे.
सीना धरणात मागील वर्षी पावणे दोन टीएमसी पाणी होते. यंदा अर्धा टीएमसी पाणी आहे. मांडओहळ, घाटशीळ पारगाव मध्यम प्रकल्पात पाणीच नाही. आढळा, घोड, खैरी, मुसळवाडी, टाकळीभान धरणात गतवर्षीपेक्षा यंदा अल्प पाणीसाठा आहे. उत्तरेत भंडारदरा, निळवंडे धरणाचे पोट खपाटीला गेले आहे, मात्र त्याहीपेक्षा दक्षिण भागात स्थिती गंभीर आहे. धरण, मध्यम, लघू प्रकल्पांसह गावतलाव, पाझर तलाव कोरडे पडलेले असल्याने टंचाईचा प्रश्‍न वरचेवर गंभीर होत असून, अजून तीन महिन्यांचा कालावधी जायचा असल्याने उपलब्ध पाण्याचे नियोजन करणे गरजेचे आहे.
नगर जिल्ह्यातील स्थिती
धरणांतील पाणी साठवण क्षमता ५७ टीएमसी
उपयुक्त एकूण पाणी साठवण क्षमता ५० टीएमसी
सध्याचा एकूण उपलब्ध पाणीसाठा २२ टीएमसी
सध्याचा उपयुक्त उपलब्ध पाणीसाठा १५ टीएमसी
गतवर्षीचा एप्रिलमधील उपलब्ध पाणीसाठा ३४ टीएमसी
गतवर्षीचा एप्रिलमधील उपयुक्त उपलब्ध पाणीसाठा २८ टीएमसी
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.