Kolhapur Market Yard : कोल्हापूर आणि कोकणाला संलग्न असणाऱ्या शाहू मार्केट यार्डातील घाऊक बाजारपेठेत चार दिवसांत कांद्यांची आवक वाढली. त्यामुळे कांद्याचे भाव घसरले असून १४० रुपये दहा किलो असा घाऊक भाव आहे.

किरकोळ बाजारपेठेत कांद्याचे भाव स्थिर आहेत. दरम्यान कांदा उत्पादन पट्ट्यात पावसाची शक्यतेने कांद्याची आवक वाढल्याचे बोलले जात आहे.

गेल्या आठवड्याभरात राज्यातील विशेषतः कांदा उत्पादन पट्ट्यात ढगाळ वातावरण, वळीव पावसाची शक्यता निर्माण झाली. त्यामुळे शेतकऱ्यांचे कांदा भिजून नुकसान होऊ नये यासाठी बहुतांशी कांदा बाजारपेठेकडे पाठवला. त्यामुळे कोल्हापुरात रोज सरासरी ४० गाड्या कांदा मालाची आवक होत आहे.

एकाच वेळी मोठ्या प्रमाणात कांदा बाजारात आला तसेच यंदा कोकण व गोव्यात पर्यटकांची संख्या रोडावली आहे. त्यामुळे कांद्याला मागणी नाही. अशा स्थितीत कांदा येथे पडून राहण्याची शक्यता वाढली. त्यामुळे कांद्याचे भाव घसरले आहेत. चार दिवसांत कांद्या भाव कमी झाले असले तरी कमी भावातील कांदा किरकोळ बाजारपेठेत आलेला नाही.

त्यामुळे मागील आठवड्यात सरासरी ८० ते २५० रुपये दहा किलो प्रमाणे खरेदी केलेला कांदाचा किरकोळ बाजारपेठेत २० ते २५ रुपये एक किलो भावात विकला जात आहे.

घसरलेले भाव असे

शाहू मार्केट यार्डातील घाऊक बाजारात प्रथम श्रेणी कांद्याचे भाव १४० रुपये दहा किलो, व्दितीय श्रेणी कांद्याचे भाव १०० रुपये तर तृतीय श्रेणी कांद्याचे भाव ६० रुपये आहेत. असा कमी दरात खरेदी केला कांदा दोन दिवसांत किरकोळ बाजारात आल्यानंतर किरकोळ बाजारपेठेत कांद्याचे भाव कमी होण्याची शक्यता आहे.