Pune Cow Milk Rate : पुणे जिल्हा सहकारी दूध उत्पादक संघ (कात्रज डेअरीने) उद्यापासून (ता.०१) गाय दूध विक्री दरात कपात केली आहे. ही कपात प्रतिलिटर मागे दोन रुपये असल्याची माहिती देण्यात आली. सध्या ५५ रुपये असलेला दर ५३ रुपयांवर करण्यात येणार असल्याची माहिती संघाचे व्यवस्थापकीय संचालक मनोज लिमये यांनी दिली.

दरम्यान मागच्या काही दिवसांपासून दूध दरावरून दुग्ध उत्पादक शेतकऱ्यांचे जोरदार आंदोलन सुरू आहे. अशातच ग्राहकांना दिलासा देणारा निर्णय कात्रज डेअरीने घेतला आहे. कात्रज दूध संघाच्या संचालक मंडळाची बैठक २४ नोव्हेंबर रोजी संघाचे अध्यक्ष भगवान पासलकर यांच्या अध्यक्षतेखाली झाली. त्यामध्ये हा निर्णय घेण्यात आला.

तसेच कमी स्निग्ध व जास्त प्रोटीन असलेले गायीचे दूध २५० मिलिच्या पॅकिंगमध्ये ग्राहकांना १२ रुपये दराने उपलब्ध करुन देण्यात येणार आहे. कात्रज दूध हे पुणे व पिंपरी-चिंचवडमधील ग्राहकांच्या पसंतीस उतरले असून संघाकडून नेहमीच स्वच्छ, ताजे व भेसळविरहित दूधाचा पुरवठा केला जातो अशी माहिती देण्यात आली.

संघाचे रोजचे दूध संकलन सध्या दोन लाख लिटरवर पोहोचले आहे. नेहमीच्या तुलनेत संघाकडे सुमारे ७५ ते ८० हजार लिटरइतके अतिरिक्त दूध होत आहे. दुधाचे खरेदी दर उतरल्यामुळे विक्री दरात दोन रुपयांनी कपात करुन ग्राहकांना दिलासा देण्याचा निर्णय संचालक मंडळाने घेतला आहे. त्यामुळे कात्रजचे दूध आणि दुग्धजन्य पदार्थांच्या खरेदीस ग्राहकांनी पसंती दयावी असे आवाहन कात्रज दूध संघ पुणे अध्यक्ष भगवान पासलकर म्हणाले.