Pune News : ग्रामीण भागातील विविध कार्यकारी सोसायट्यांमधून बी-बियाणे आणि खतांची विक्री करण्यास मान्यता देण्यात आली आहे. त्यानुसार राज्यातील सुमारे ६०० सोसायट्यांमधून बी-बियाण्यांची विक्री सुरू करण्यात आली आहे, अशी माहिती सहकार विभागाच्या सूत्रांनी दिली.

राज्यात सुमारे २० हजार विविध कार्यकारी सोसायट्या आहेत. या सुविधेमुळे शेतकऱ्यांना गावातच चांगली व दर्जेदार बी-बियाणे मिळतील. विविध कार्यकारी सोसायट्यासुद्धा स्वावलंबी होण्यास मदत होईल.

विविध कार्यकारी सोसायट्या आर्थिकदृष्ट्या बळकट होणे व त्या माध्यमातून पतपुरवठा, विविध सेवा व वस्तूंचा पुरवठा ग्रामीण भागातील नागरिकांना व्हावा, या दृष्टिकोनातून या संस्थांचे संगणकीकरण होत आहे.

या संस्थांच्या पोटनियमामध्ये काही बदल करण्यात आले आहेत. तसेच या संस्थांना १५२ प्रकारच्या वस्तू व सेवांचा व्यवसाय करता येईल, अशीही तरतूद करण्यात आली आहे. त्यानुसार सोसायट्यांमध्ये बी-बियाणे विक्री करण्यास सुरुवात झाली आहे.

विविध प्रकारच्या ई-सेवा देण्याच्या दृष्टिकोनातून या संस्थांमार्फत ‘कॉमन सर्व्हिस सेंटर’ सुरू करण्याबाबत कार्यवाही सुरू आहे. आतापर्यंत ४ हजार ५०० सोसायट्यांनी ‘कॉमन सर्व्हिस सेंटर’ अंतर्गत नोंदणी केली आहे.

थोडक्यात महत्त्वाचे...

- विविध कार्यकारी सोसायट्यांच्या पोटनियमांत काही बदल

- १५२ प्रकारच्या वस्तू व सेवांचा व्यवसाय करता येणार

- ‘ई-सेवा’साठी ‘कॉमन सर्व्हिस सेंटर’ होणार सुरू

- आतापर्यंत ४ हजार ५०० सोसायट्यांची ‘कॉमन सर्व्हिस सेंटर’ अंतर्गत नोंदणी