Pune News: पुणे कृषी उत्पन्न बाजार समितीमधील गैरव्यवहारांवर तत्कालीन पणनमंत्री अब्दुल सत्तार यांनी चौकशीचे आदेश दिले होते. त्यावर पणन उपसंचालक मोहन निंबाळकर यांची चौकशी समिती स्थापन नेमली गेली.

वर्ष होत आले असताना, तसेच पणन संचालकांच्या अहवाल सादर करण्याच्या सूचनेनंतरही अद्याप चौकशी अहवाल गुलस्तात आहे. त्यामुळे अहवाल दाबण्याचा खटाटोप सुरू असल्याची चर्चा पणन आणि बाजार समिती आवारात आहे.

पुणे बाजार समितीवर संचालक मंडळ स्थापन झाल्यावर विविध गैरव्यवहारांची चर्चा बाजार आवारात सुरू झाली. यामध्ये पार्किंग निविदा, सुरक्षारक्षक निविदा, अतिरिक्त दरांच्या निविदा, अनधिकृत बांधकामे, सेस चोरी आदी विविध गैरव्यवहारांच्या चौकशीचे आदेश देण्यात आले होते. एक वर्ष संपत आले तरी अद्याप चौकशी अहवाल गुलदस्तातच आहे.

दरम्यान, ज्यांच्या पर्वती विधानसभा मतदारसंघात बाजार समिती येते, त्या नगरविकास राज्यमंत्री माधुरी मिसाळ यांनी देखील बाजार समिती बरखास्त करण्याची मागणी थेट मुख्यमंत्र्यांकडे केली.

यामुळे गैरव्यवहार होत असलेल्या विविध घटकांच्या मागणीला बळकटी आली आहे. चौकशी अहवाल आणि बरखास्तीची टांगती तलवार बाजार समिती संचालकांवर असल्याने ‘अधिक’ची कामे करण्यात ते अधिक व्यग्र आणि अस्वस्थ असल्याची चर्चा आहे.