Pune News : आंबेगाव तालुक्यातील निरगुडसर येथील पंडित जवाहरलाल नेहरू माध्यमिक व द. गो. वळसे पाटील उच्च माध्यमिक विद्यालयातील आयबीटी विभागाच्या आठवी व नववीच्या विद्यार्थ्यांनी बनविलेले फळभाज्या धुण्याचे यंत्र प्रदर्शनात आकर्षण ठरले.

पाबळ (ता. शिरूर) येथील आयबीटी विज्ञान आश्रम आयोजित टेक्नोव्हेशन प्रदर्शन जे.पी.नाईक सेंटर फॉर एज्युकेशन, कोथरूड-पुणे या ठिकाणी शुक्रवारी (ता. २२) आयोजित केले होते. या प्रदर्शनात राज्यातील ३५ शाळांनी सहभाग घेतला होता.

विद्यार्थ्यांनी आसपासच्या परिसरातील शेतकऱ्यांशी चर्चा करून शेतकऱ्यांना येणाऱ्या समस्या जाणून घेतल्या. सगळ्यात मोठ्या प्रमाणामध्ये एक समस्या सर्व शेतकऱ्यांना होती. ती म्हणजे शेतकरी बीट पिकवतात, पण ते बीट स्वच्छ धुवूनच बाजारामध्ये चांगला हमीभाव भेटतो.

तसेच बीट, मुळा, गाजर, आले यासारखी कंदमुळे धुण्यासाठी कोणतेही यंत्र उपलब्ध नाही. शेतकऱ्यांना वॉशिंग सेंटर किंवा मग स्वतः हाताने साफ करायला लागत असे. म्हणून विद्यार्थ्यांनी शेतकऱ्यांचा विचार करून फळभाज्या धुण्याचे यंत्र तयार केले.

या यंत्रामध्ये फळभाज्या व कंदमुळाचा गाळ, माती साफ होऊन हॅण्डलच्या साहाय्याने ब्रश फिरून फळभाज्या साफ होतात. यंत्र बनविणाऱ्या विद्यार्थांना प्राचार्य कांताराम टाव्हरे यांच्या मार्गदर्शनाखाली आयबीटी विभागाचे शिक्षक कल्पना चव्हाण, तेजस्वी दांगट, भावना कहाने, गोरक्ष टाव्हरे आदींनी मार्गदर्शन केले.