Nashik News : राष्ट्रवादी काँग्रेसमध्ये (अजित पवार गट) असलेले विधानसभेचे उपाध्यक्ष नरहरी झिरवाळ घरवापसी करीत असल्याची चर्चा असतानाच झिरवाळ यांचे पुत्र गोकूळ झिरवाळ यांनी थेट राष्ट्रवादी काँग्रेस शरदचंद्र पवार पक्षाने उमेदवारी दिल्यास वडिलांविरोधात लढण्यास तयार असल्याची भूमिका जाहीर केली आहे. प्रदेशाध्यक्ष जयंत पाटील यांच्या उपस्थितीत झालेल्या मेळाव्याला गोकूळ यांनी हजेरी लावल्याने राजकीय चर्चांना उधाण आले आहे.

गत लोकसभा निवडणुकीत गोकूळ झिरवाळ यांनी थेट राष्ट्रवादी काँग्रेस शरदचंद्र पवार पक्षाकडे उमेदवारीची मागणी केली होती. त्यानंतर त्यांनी शरद पवार यांची भेटही घेतली. यातच, विधानसभेचे उपाध्यक्ष झिरवाळ यांनी आपल्या वाढदिवसाच्या जाहिरातींमध्ये थेट शरद पवार, श्रीराम शेटे यांची छायाचित्रे वापरली होती. त्या वेळी झालेल्या कार्यक्रमांत श्री. झिरवाळ यांनी पुन्हा घरवापसीचे संकेत दिले होते. असे असतानाच त्यांचे पुत्र गोकूळ यांनी मंगळवारी (ता. २३) प्रदेशाध्यक्ष पाटील यांच्या उपस्थितीत झालेल्या मेळाव्याला हजेरी लावली. त्यानंतर त्यांनी माध्यमांशी संवाद साधला.

गोकूळ म्हणाले, की मी महाविकास आघाडी आणि राष्ट्रवादी काँग्रेस शरदचंद्र पवार पक्षातच आहे. मी लोकसभा निवडणूकही लढण्यास इच्छुक होतो. विधानसभेची निवडणूक लढण्यास मी इच्छुक आहे. पक्षाने सूचना केली तर मी दिंडोरीतून वडील नरहरी झिरवाळ यांंच्या विरोधात लढण्यास तयार आहे.

पिता-पुत्र लढतीची कमालीची उत्सुकता

राज्यातील राजकारणात आजवर जनतेने बाळासाहेब ठाकरे-राज ठाकरे, शरद पवार-अजित पवार यासह अनेक राजघराण्यांतील काका-पुतणे, उद्धव ठाकरे-राज ठाकरे, व्यंकटराव हिरे-डॉ. बळिराम हिरे असा भाऊ-भाऊ, सुप्रिया सुळे-सुनेत्रा पवार असा नणंद-भावजय, तसेच पंकजा मुंडे-धनंजय मुंडे बहीण-भाऊ आदींचे राजकारण व लढती पाहिल्या. आता विधानसभा उपाध्यक्ष नरहरी झिरवाळ यांच्याविरुद्ध त्यांचे पुत्र गोकूळ झिरवाळ यांनी शड्डू ठोकल्याने राज्यातील जनतेला पिता-पुत्र असा संघर्ष पाहायला मिळणार का, याचीच उत्सुकता राज्याला लागली आहे.