Jalna News : शेतकऱ्यांची बँक असलेल्या जिल्हा मध्यवर्ती सहकारी बँकेची निवडणूक जाहीर झाली आहे. मात्र, बँकेला निवडणुकीच्या खाईत न ढकलता निवडणूक बिनविरोध करण्यासाठी सर्व पक्षीय राजकीय नेत्यांनी प्रयत्न सुरू केले आहेत.

त्यामुळे येत्या काळात सर्वपक्षीय नेत्यांच्या बैठकांना वेग येणार असल्याची शक्यता असल्याने जुलै महिन्याच्या पहिल्या आठवड्यात जिल्हा बँकेच्या निवडणुकीचे चित्र स्पष्ट होण्याची शक्यता आहे.

प्रत्येक जिल्ह्याच्या राजकारणात जिल्हा मध्यवर्ती सहकारी बँक केंद्रबिंदू असते. मात्र, जालना जिल्हा मध्यवर्ती सहकारी बँकेची काही वर्षांपूर्वी आर्थिक स्थिती डबघाईला आली होती. मात्र, मागील दशकापासून जिल्हा मध्यवर्ती बँकेच्या आर्थिक स्थितीमध्ये सुधारणा होत असून, बँकेला आर्थिक नफा होत असल्याचे चित्र पाहण्यास मिळत आहे.

शिवाय भारतीय रिझर्व्ह बँकेचे सर्व निर्बंधही हटले असून, नाबार्डच्या तपासणीमध्ये जिल्हा बँकेला बी प्लस वर्गवारी मिळाली आहे. तर, बँकेची आर्थिक स्थिती भक्कम होत चालली असल्याने बँकेकडून शेतकऱ्यांना शंभर कोटींपेक्षा अधिक पीककर्ज वाटप केले जात आहे.

जिल्हा बँकेची मागील निवडणूक ही सर्व पक्षांच्या राजकीय नेत्यांनी एकत्र बसून १७ पैकी १५ जागा बिनविरोध केल्या होत्या. तर, केवळ दोन जागांसाठी निवडणूक झाली आहे.

यंदा ही बँकेची निवडणूक बिनविरोध करण्यासाठी सर्व पक्षीय राजकीय नेत्यांकडून पुढाकार घेण्यात आला असून, सर्व पक्षीय नेत्यांच्या बैठकांना येत्या काही दिवसांमध्ये वेग येणार असल्याचे संकेत आहेत.