Sangli Ethanol News : विस्तारीकरणासह आधुनिकीकरण व इथेनॉल निर्मितीची कामे वेगाने सुरू असून, ती लवकरच पूर्णत्वाकडे जातील, असा विश्वास विश्वासराव नाईक सहकारी कारखान्याचे अध्यक्ष, आमदार मानसिंगराव नाईक यांनी व्यक्त केला.

चिखली (ता. शिराळा) येथील कारखान्यात गळीत हंगाम २०२३-२४ साठीच्या रोलरच्या पूजनप्रसंगी अध्यक्ष नाईक बोलत होते. उपाध्यक्ष, माजी आमदार बाबासाहेब पाटील प्रमुख उपस्थित होते.

श्री. नाईक म्हणाले, की महाराष्ट्रात ‘विश्वास’चे नाव सक्षम कारखान्यांत घेतले जाते. अधुनिकतेची कास धरत टप्प्याटप्प्याने नियोजन करत विविध प्रकल्पांची उभारणी केली आहे. त्यामध्ये आसवणी, सहवीजनिर्मिती, कंपोस्ट खत, द्रवरूप जैविक खते, बियाणे, कार्बनडाय ऑक्साईड प्रकल्प आदींची उभारणी झाली आहे.

प्रतिदिन १२०० टन क्षमतेवरून आज ५००० हजार टन इतकी क्षमतेत वाढ झाली आहे. आता विस्तारीकरणासह आधुनिकीकरण तसेच इथेनॉल निर्मिती प्रकल्पाची उभारणी सुरू आहे. हे करत असताना कारखान्याचे अर्थकारण सांभाळले आहे.

बाबासाहेब पाटील म्हणाले, की दुर्गम व डोंगरी भागातील शेतकऱ्यांना व बेरोजगार युवकांना न्याय देण्यासाठी विश्वास कारखान्याची उभारणी झाली.

कारखान्याने प्रगतीचे अनेक टप्पे पार केले. विविध उपपदार्थनिर्मिती करणारे प्रकल्प उभारले आहेत. व्यवस्थापक दीपक पाटील यांनी स्वागत केले.

या वेळी संचालक दिनकरराव पाटील, विजयराव नलवडे, सुरेश चव्हाण, सुरेश पाटील, हंबीरराव पाटील, शिवाजी पाटील, संभाजी पाटील, सुहास घोडे-पाटील, विश्वास कदम, बाळासाहेब पाटील, यशवंत निकम, यशवंत दळवी, बिरुदेव आंबरे, सुकुमार पाटील, दत्तात्रय पाटील, आनंदा पाटील यांच्यासह विश्वास पाटील, कोंडिबा चौगुले, अधिकारी व कर्मचारी उपस्थित होते. सचिव सचिन पाटील यांनी आभार मानले.