Kolhapur Gokul Dudh Sangh : मार्च महिन्यापर्यंत होणाऱ्या महापालिका, जिल्हा परिषद या स्थानिक स्वराज्य संस्थांच्या निवडणुकांना आम्ही महायुती म्हणून सामोरे जाणार आहोत. मात्र, सहकार टिकणे आवश्यक आहे. त्यामुळे गोकुळ आणि जिल्हा बँकेत (केडीसीसी) कोणताही बदल होणार नाही. असे आमदार हसन मुश्रीफ यांनी गुरूवार (ता.२८) शासकीय विश्रामगृहात रात्री उशिरा पत्रकारांशी संवाद साधला यावेळी सांगितलं.

महापालिका निवडणुका मार्चपर्यंत आणि त्यानंतर जिल्हा परिषदेच्या निवडणुका होतील. या स्थानिक स्वराज्य संस्थांच्या निवडणुकीमध्ये महायुती म्हणून आम्ही सर्व घटक पक्ष लढणार आहोत. पण, निवडणुकांवेळी काही परिस्थिती निर्माण झाली आणि आम्ही स्वतंत्रपणे लढलो, तरी या संस्थांमध्ये सत्ता स्थापनेवेळी महायुती म्हणूनच आम्ही एकत्र येणार आहोत.

दरम्यान, जिल्ह्यातील सहकार टिकला पाहिजे. सहकार क्षेत्राच्या वाढीसाठी सहकारी संस्था टिकणे अत्यंत आवश्यक आहे. जिल्ह्यातील गोकुळ दूध संघ आणि जिल्हा बँकेचे काम अत्यंत चांगल्या पद्धतीने सुरू आहे. या दोन्ही संस्थांमध्ये आता ज्या पद्धतीने आम्ही सर्वपक्षीय नेते जसे एकत्र आहोत, ते त्याप्रमाणेच कायम राहणार आहे. त्यामध्ये कोणत्याही स्वरूपातील बदल होणार नाही. सहकारी संस्थांमध्ये सर्वांना सोबत घेऊन जाण्याचे धोरण राहणार आहे. या संस्था टिकण्यासाठी राजकारण येता कामा नये. ते आम्ही महायुतीतील वरिष्ठ नेत्यांना पटवून देणार असल्याचे आमदार मुश्रीफ यांनी सांगितले.

समरजीत घाटगेंची चौकशी लावणार

निवडणुकीत माझ्यावर आरोप करणाऱ्या समरजितसिंह घाटगे यांनी सिद्धनेर्लीत शंभर वर्षांपूर्वी दलित समाजाला दिलेली जमीन काढून घेतली. शाहू दूध संघाचे काय झाले? त्याची उत्तरे दिली नाहीत. आता निवडणूक झाली. पण, प्रचाराच्या काळात बोलल्याप्रमाणे शाहू दूध संघाच्या अनुदान प्रकरणाबाबतच्या चौकशीची ईडीकडे मागणी करणार आहे. त्याबाबतची प्रक्रिया सुरू केल्याचे आमदार मुश्रीफ यांनी सांगितले.

लाडक्या बहिणींचा आशीर्वाद मिळाला

आमदार मुश्रीफ म्हणाले, "कागल मतदारसंघातील यंदाची विधानसभा निवडणूक माझ्यासाठी एकतर्फी होती. माझ्या विरोधात लढणाऱ्या समरजितसिंह घाटगे यांनी अनेक खोटे, चुकीचे आरोप केले. त्याला आम्हीही ताकदीने प्रत्युत्तर दिले. मुख्यमंत्री लाडकी बहीण योजना आमच्यासाठी फार मोठी गेमचेंजर ठरली. माझा विजय तर झालाच. पण, राज्यातही पुन्हा महायुतीचे सरकार आले. आमच्या पक्षाची कामगिरीही चांगली झाली. माझ्या कागल-उत्तूर-गडहिंग्लज मतदारसंघाचा जास्तीतजास्त विकास करणार असल्याचे मुश्रीफ म्हणाले".