Pune News: माजी कृषिमंत्री धनंजय मुंडे यांच्या काळात ‘ई-मेल’द्वारे नियुक्ती केलेल्या गुणनियंत्रण निरीक्षकाला पदावर हटविण्याचे आदेश मंत्रालयातून देण्यात आले आहे.सातारा येथील खंडाळा तालुका कृषी अधिकारी कार्यालयातील अधिकारी विलास बापूराव धायगुडे गेल्या काही महिन्यांपासून चर्चेत आहेत. त्यांची नियुक्ती पुणे जिल्हा अधीक्षक कृषी अधिकारी कार्यालयातील गुणनियंत्रण कक्षातील ‘कृषी अधिकारी (गुणनियंत्रण)’ पदावर करण्यात आली होती.

नियम डावलून केवळ ई-मेलद्वारे मंत्रालयातून झालेली ही नियुक्ती चुकीची आहे, असा मुद्दा दुसरे गुणनियंत्रण अधिकारी धनंजय दिनकर पाटील यांनी उपस्थित केला होता. पाटील यांनी धायगुडे यांच्या विरोधात महाराष्ट्र प्रशासकीय न्यायाधिकरणात (मॅट) याचिकादेखील दाखल केली होती. या दाव्यात मॅटने धायगुडे यांची नियुक्ती अवैध असल्याचा निकाल १४ फेब्रुवारी २०२५ रोजी दिला आहे.

सूत्रांच्या म्हणण्यानुसार, या प्रकरणी कृषी मंत्रालयातील अवर सचिव प्रशांत पिंगळे यांनी कृषी आयुक्त सूरज मांढरे यांना सोमवारी (ता.२४) एक पत्र पाठवले आहे. ‘‘न्यायाधीकरणाने दिलेल्या आदेशानुसार धायगुडे यांना इतर पदावर नियुक्ती देणे आवश्यक आहे. त्यामुळे त्यांना इतर ठिकाणी नियुक्ती देण्याचा प्रस्ताव शासनाला सादर करावा,’’ असे या पत्रात सूचित करण्यात आले आहे.

आयुक्तालयातील सूत्रांच्या म्हणण्यानुसार, पुणे जिल्हा अधीक्षक कृषी अधिकारी कार्यालयातील गुणनियंत्रण कक्षाच्या कृषी अधिकारीपदासाठी धनंजय दिनकर पाटील यांची नियुक्ती करण्यात आली होती. या पदावर ते रुजू झाले होते. मात्र, त्यानंतर याच पदावर विलास धायगुडे यांना नियुक्त करण्यात आले. या नियुक्तीला पाटील यांनी न्यायालयात आव्हान दिले होते. परंतु न्यायालयाने धायगुडे यांच्या नियुक्तीचा आदेश रद्द केला आहे. त्यामुळे आता त्यानुसार निर्णयात सुधारणा करण्याची गरज आहे.

गैरप्रकार पुन्हा एकदा उघड

गुणनियंत्रण निरीक्षकपदावरून विलास धायगुडे यांना हटवून आता धनंजय पाटील यांची नियुक्ती पुण्याच्या गुणनियंत्रण निरीक्षकपदी होण्याची शक्यता आहे. मात्र या प्रकरणामुळे कृषी विभागाच्या गुणनियंत्रण विभागातील मोक्याची पदे बळकावण्यासाठी होत असलेला गैरप्रकार पुन्हा एकदा उघड झाला आहे.