Jalgaon News : खानदेशात अवकाळी पाऊस, गारपिटीने मोठी पीकहानी झाली आहे. कोट्यवधींची केळी, कांदा आदी पिके भूईसपाट झाली असून, सुमारे २१ हजार हेक्टरला फटका बसला आहे. एकट्या जळगाव जिल्ह्यात १८ हजार हेक्टरवरील पिकांचे नुकसान झाले आहे.

पंचनामे पूर्ण झाले आहेत. शेतकऱ्यांनी तत्काळ भरपाई मिळावी, अशी अपेक्षा व्यक्त केली आहे. धुळे, नंदुरबारात अनेक भागात पिकांचे अंशतः नुकसान झाले आहे. तसेच काही भागात अधिकचा फटका बसला आहे. जळगाव जिल्ह्यात एकूण २१५ गावांमधील २१ हजार ६७ शेतकऱ्यांना नुकसानीचा फटका बसला.

पारोळा, चाळीसगाव, धरणगाव, चोपडा, अमळनेर या तालुक्यांना गारपिटीचा मोठा फटका बसला. सोमवारी रात्री झालेला अवकाळी पाऊस व गारपिटीमुळे पारोळा तालुक्यातील झालेल्या शेतीच्या नुकसानीची उपविभागीय अधिकारी, तहसीलदार यांनी विविध प्रक्षेत्रांत भेटी देऊन पाहणी केली.

मौजे मोंढळे (ता. पारोळा) येथे गारपीट होऊन शेती पिकाचे नुकसान झाले आहे. नुकसानीचे सरसकट पंचनामे करा, असे आदेश जिल्हाधिकारी आयुष प्रसाद यांनी पारोळा तालुक्यात पीकहानीच्या पाहणीप्रसंगी दिले आहेत. पंचनामे काही भागात लांबले आहेत. कारण मनुष्यबळ कमी आहे.

तर काही भागात पंचनामे पूर्ण झाले असून, अहवाल तालुका प्रशासनाकडे बुधवारी (ता.२८) प्राप्तही झाले. हे अहवाल अंतिम करून जिल्हा प्रशासनाकडे पोचतील. जिल्हा प्रशासन आपला अहवाल नाशिक येथील विभागीय महसूल आयुक्त यांच्याकडे सादर करतील, अशी माहिती मिळाली.

तालुकानिहाय झालेले नुकसान

तालुका हेक्टर

चाळीसगाव ३५९३

भडगाव ९२३१

अमळनेर ३३९०

पारोळा ६३७५

धरणगाव १३५

चोपडा ४९९०.२०