Pune News : सरकारने जाहीर केलेल्या जुलै ते सप्टेंबर या तीन महिन्यांत आलेल्या प्रस्तावांचे १७९ कोटी दिले; परंतु त्यानंतर दुधाला जाहीर केलेले प्रतिलिटर सात रुपये अनुदान १ ऑक्टोबर ते १५ जानेवारी या साडेतीन महिन्यांपासून रखडले आहे.

सरकारकडून अनुदान प्राप्त न झाल्याने ऑक्टोबरपासून जिल्हा दूध विकास विभागाने दूध अनुदानाचे प्रस्तावच घेतले नसल्याने दूध अनुदान मिळणार की नाही, असा प्रश्‍न उपस्थित राहत आहे. अशामध्ये जनावरांना आहारात रोज लागणारा भुसा ५० किलो बॅगमागे २०० रुपयांनी महागल्याने उत्पादन खर्चात वाढ झाली आहे. त्यामुळे शेतकरी अडचणीत सापडला आहे.

शासनाच्या १२ जुलै २०२४च्या निर्णयानुसार दूध उत्पादक शेतकऱ्यांना प्रतिलिटर पाच रुपये अनुदान योजना जाहीर करण्यात आली होती. ही योजना १ जुलै २०२४ पासून सुरू झाली असून, या योजनेत पुणे जिल्ह्यातील ११८ सहकारी व खासगी दूध प्रकल्पांनी सहभाग नोंदवला आहे.

१ जुलै ते ३० सप्टेंबर २०२४ या तीन महिन्यांसाठी सरकारने प्रतिलिटर पाच रुपये अनुदान देण्याची घोषणा केली होती. त्या वेळी दुधाला फॅट ३.५ आणि ८.५ एसएनएफसाठी ३० रुपये दर होता. या तीन महिन्यांचे १७९ कोटी रुपयांचे अनुदान सरकारने दूध उत्पादक शेतकऱ्यांना दिले आहे.

त्यामध्येही अनेक दूध उत्पादक शेतकरी वंचित आहेत. त्यानंतर १ ऑक्टोबर २०२४ पासून प्रतिलिटर दोन रुपये वाढ करून सात रुपये अनुदान देण्याचे जाहीर करण्यात आले. फॅट ३.५ आणि ८.५ एसएनएफसाठी २८ रुपये दूध दर करण्यात आला होता. मात्र, हे अनुदान शेतकऱ्यांना अद्याप मिळालेले नाही.