Amarvatai News : उन्हाची दाहकता वाढताच मेळघाटात पाणीटंचाईने डोके वर काढले असून लहान मुलांपासून वृद्धांपर्यंत साऱ्यांचीच पाण्यासाठी भटकंती सुरू झाली आहे. मार्च अखेरपर्यंत सुमारे २०० गावांना पाणीटंचाईच्या भीषण संकटाला सामोरे जावे लागणार असून दरवर्षीच्या त्याच त्या उपाययोजनांचा पाढा या वेळीसुद्धा वाचण्याची तयारी सुरू आहे.

मेळघाटातील चिखलदरा व धारणी तालुक्यांत ३५० च्या जवळपास गावे असून अनेक गावे डोंगरउतारावर आहेत. जिल्ह्यात सर्वांत जास्त पाऊस चिखलदरा तालुक्यात पडतो. अनेकदा ८० ते ९० दिवस सूर्य दिसत नाही.

मात्र याच तालुक्यात आदिवासी पाड्यांमध्ये, तांडा-वस्त्यांमध्ये पाण्याची तीव्र पाणीटंचाई उन्हाळ्यात जाणवते. याठिकाणच्या आदिवासी बांधवांना पाण्यासाठी दाही दिशा भटकंती करावी लागते. रात्रभर जागून पाणी भरावे लागते, अशी भयावह परिस्थिती उन्हाळ्यात दिसून येते.

यावर प्रशासन मात्र थातूरमातूर उपाययोजना करून वेळ मारून नेते. अधिकारी तात्पुरत्या उपायोजना करतात आणि पुन्हा जैसे-थे परिस्थिती राहते. पाणीटंचाईची भीषणता डोके वर काढत आहे.

खडीमलवासीयांचे हाल

खडीमल गावाचा पाण्याचा प्रश्न देशपातळीवर चर्चेला आला होता. परंतु या गावात अजूनही पाण्याच्या संदर्भात कुठल्याही ठोस उपाययोजना करण्यात आलेल्या नाहीत. या गावाची लोकसंख्या हजार ते बाराशे असूनसुद्धा पाण्याचा प्रश्न गंभीर स्थितीत आहे.

आदिवासी बांधवांसाठी शेकडो योजना असल्याचे शासनदरबारी सांगण्यात येते, मात्र साधे पाणीसुद्धा या आदिवासी बांधवांच्या नशिबी नाही काय, असा प्रश्न करण्यात येत आहे. खडीमल, माखला, चुनखडी, हातरू, नवलगाव, बिच्छूखेडा, सोनापूर, सलिता, सुमिता, पाचडोंगरी, मोथा यांसह अनेक गावांत तसेच विदर्भाचे नंदनवन असलेल्या चिखलदरा शहरात सुद्ध पाण्याची तीव्र टंचाई असते.