Nagpur News : दुधातील भेसळीमुळे अनेक जीवघेणे आजार जडण्याची दाट शक्यता बळावली आहे. तेव्हा दूध उत्पादनात अग्रेसर असलेल्या मौदा तालुक्यातील नागरिकांना शुद्ध दूध मिळण्यासाठी तसेच दुधातील भेसळ बंद करण्यासाठी उपाययोजना कराव्यात, यासाठी अखिल भारतीय ग्राहक पंचायतच्या वतीने मोहीम राबविण्यात येत आहे. याच मोहिमेअंतर्गत मौदा शाखेतर्फे तहसीलदार व संबंधित अधिकाऱ्यांना मागण्याचे निवेदन देण्यात आले.

अधिक पैसा कमाविण्याच्या हव्यासापोटी दुधामध्ये युरिया, डिटर्जंट, पाम ऑइल, कॉस्टिक सोडा, बोरिक ॲसिड, आधी पदार्थांचा सर्रास वापर केला जातो. सिंथेटिक भेसळयुक्त दूध व दुग्धजन्य पदार्थ तयार केले जात आहेत. भेसळयुक्त दुधाचा दीर्घकाळ वापर केल्याने आरोग्यावर गंभीर परिणाम होत आहेत.

पोटाचे विकार, उलट्या, जुलाब, ॲलर्जी, किडनी, हृदयाचे आजार, प्रतिकारशक्ती कमी होणे, कर्करोगासारखे गंभीर आजार होऊ शकतात. कृत्रिम, भेसळयुक्त दूध उत्पादनात गुंतलेल्या व्यावसायिकांवर फौजदारी कारवाई करण्याची मागणी अखिल भारतीय ग्राहक पंचायतीने केली.

अखिल भारतीय ग्राहक पंचायत राष्ट्रीय संघटनेच्या निर्देशानुसार व ग्राहक पंचायत विदर्भ प्रांताच्या विशेष पुढाकाराने दूध भेसळीची जबाबदारी निश्चित करावी आणि, ज्या भागात ही भेसळ आढळून येईल, त्या क्षेत्राच्या अधिकाऱ्यांवरही कडक कारवाई करावी, अशा मागणीचे निवेदन मौदाचे तहसीलदार धनंजय देशमुख यांना देण्यात आले. तुकाराम लुटे, डॉ. नीलिमा घाटोळे, वनिता अंबरते, अर्चना रंगारी, उषा धांडे, मोनाली तुपट आदी कार्यकर्त्यांनी निवेदन सादर केले.

ग्राहक पंचायतच्या मागण्या

जिल्ह्यात अन्न तपासणी मोबाइल व्हॅन असावी

भेसळ रोखण्यासाठी भरारी पथकाची स्थापना करावी

जिल्ह्यात प्रत्येक तहसिल स्तरावर नमुने तपासण्यासाठी प्रशासनाकडून एक ‘मोफत ओपन टेस्टिंग सेंटर’ असावे

जिल्ह्यात पुरेशा प्रमाणात अन्न निरीक्षकांची नियुक्ती करावी

प्रशासनाने केलेल्या तपासणीअंती दुधात भेसळीचे प्रमाण आढळून आल्यावर त्याची सोशल मीडिया, वृत्तपत्रे आदींद्वारे मोठ्या प्रमाणात प्रसिद्धी करावी