Solapur Apmc Update : राज्यात मागच्या काही महिन्यांपासून बाजार समित्यांच्या निवडणुका होत आहेत. काही दिवसांपूर्वी कोल्हापूर, सांगली, सातारा, पुणे, नगरमधील बाजारसमित्यांच्या निवडणुका पार पडल्या.

दरम्यान अद्यापही काही जिल्ह्यातील निवडणुका होणे बाकी आहे. परंतु या निवडणुका लांबणीवर पडण्याची शक्यता आहे. सध्या सोलापूर आणि बार्शी कृषी उत्पन्न बाजार समित्यांच्या निवडणुका लांबणीवर गेल्या आहेत.

पणन विभागाच्या सहसंचालकांनी गुरूवारी (ता. १५) यासंदर्भातील आदेश काढला. त्यानुसार सोलापूर व बार्शी कृषी उत्पन्न बाजार समितीच्या संचालक मंडळाला सहा महिन्यांची मुदतवाढ देण्यात आली आहे.

निवडणुकीचा कालावधी पावसाळ्यात येत असल्याचे कारण त्यासाठी दिले आहे. सोलापूर कृषी उत्पन्न बाजार समितीच्या सभापतीपदी भाजपचे आमदार विजयकुमार देशमुख आहेत तर बार्शीच्या बाजार समितीची सत्ता भाजप समर्थक आमदार राजेंद्र राऊत यांच्याकडे आहे.

सोलापूर व बार्शी कृषी उत्पन्न बाजार समितीमध्ये दररोज कोट्यवधी रुपयांची उलाढाल होत असते. पणन सहसंचालकांच्या आदेशानुसार २७ जानेवारी २०२४ पर्यंत या बाजार समित्यांचे संचालक मंडळ कायम राहणार आहे.

जिल्हा उपनिबंधक किरण गायकवाड यांच्या अहवालाचा आधार घेऊन मुदतवाढ देण्यात आली आहे. दरम्यान, शासनाने आमच्या कामकाजाची दखल घेत आम्हाला मुदतवाढ दिलेली आहे, त्यामुळे आम्ही समाधानी आहोत, अशी प्रतिक्रिया सोलापूरबाजारसमितीचे उपसभापती श्रीशैल्य नरोळे यांनी व्यक्त केली.