Jalgaon News : खानदेशात सातपुड्यातील आंबा प्रसिद्ध आहे. सातपुड्याच्या पायथ्याशी देखील आंबा पीक वाढले आहे. या भागातील हंगाम आता अंतिम स्थितीत आहे. यंदा नैसर्गिक फटकाही या फळ पिकास बसला आहे.

खानदेशात नंदुरबार, धुळे व जळगाव जिल्ह्यांत सातपुड्यात आंबा पीक व बागा आहेत. सातपुड्यातील अनेक वृक्ष स्थानिक गट, प्रशासनाकडे आहेत. तर काही शेतकऱ्यांनीदेखील आंबा बागा फुलविल्या आहेत. यात केसर, देशी व अन्य आंबा आहे.

सर्वाधिक बागा व वृक्ष नंदुरबार जिल्ह्यातील तळोदा, अक्कलकुवा, शहादा, धडगाव भागात आहेत. कृषी विभागानुसार सुमारे १६० हेक्टरवर नंदुरबार जिल्ह्यातील विविध तालुक्यांत आंबा बागा आहेत. तर सातपुड्यातही मोठे क्षेत्र आहे.

तळोदा तालुक्यातील अनेक शेतकरी आंबा पिकाकडे वळले आहेत. त्यात एकट्या तळोद्यात २० टक्के आंबा पीक आहे. यातील प्रतापपूर, गोपाळपूर, रांझणी आदी भागात आंबा बागा शेतकऱ्यांनी फुलविल्या आहेत. स्थानिक वाण व केसर आंबाही या भागात आहे. केसर आंब्याचे पारंपरिक वाण सातपुड्यातील आहे.

त्याचे कलम तयार न करता त्याचा प्रसार झाला असून, गोडवा व सुवास यासाठी हा आंबा प्रसिद्ध आहे. त्यास जिल्हाभर मोठी मागणी असते. खानदेशात एकूण अडीच हजार हेक्टरवर आंबा बागा आहेत. त्यात बांधावरील झाडे व सातपुड्यातील विखुरलेल्या वृक्षांचा समावेश नाही.

धडगाव भागातही देशी व केसर आंबा आहे. नंदुरबारातील शिरपूर भागात काही क्षेत्रात आंबा पीक आहे. तर जळगावात यावल, मुक्ताईनगर व रावेर भागात सातपुड्यात हे पीक आहे. या पिकास यंदा वादळाचा मोठा फटका बसला आहे. मार्च ते मे या कालावधीत चार - पाच वेळेस वादळी पाऊस, गारपीट अशी समस्या होती. यामुळे पिकाची सतत हानी झाली. अक्षय तृतीयेनंतर सातपुड्यातील आंबा बाजारात आला. सुमारे दीड महिना हा हंगाम असतो. परंतु यंदा १० ते १२ दिवस लवकर सातपुड्यातील आंबा हंगाम संपुष्टात येईल, असे दिसत आहे.

गुजरात, मध्य प्रदेशात मागणी

नंदुरबारातील आंब्यास गुजरात, मध्य प्रदेशात मागणी असते. या भागात आंब्याची मोठी उलाढाल आहे. तर जळगाव जिल्ह्यातही काहीशी उलाढाल होत असते. तुलनेत नंदुरबारातील आंबा अधिकचा परराज्यांत पाठविला जातो, अशी माहिती मिळाली.