Sindhudurg News : जिल्हयाच्या काही भागात शुक्रवारी (ता.२९) उशिरा पावसाच्या सरी बरसल्या. दरम्यान, पहाटे देखील काही भागात छिडकावा झाला असून, जिल्ह्यात सर्वत्र ढगाळ वातावरण आहे. हवामान विभागाने आज (ता.३०) हलक्या पावसाचा अंदाज दिला आहे.

जिल्ह्यात शुक्रवार सकाळपासून पावसाचे वातावरण होते. कोणत्याही क्षणी पाऊस पडेल अशी स्थिती होती. परंतु दिवसभर कुठेही पाऊस पडला नाही. मात्र रात्री दहा वाजण्याच्या सुमारास सावंतवाडी, कुडाळ, दोडामार्ग तालुक्याच्या काही भागात पावसाच्या सरी बरसल्या.

सावंतवाडी पावसाचे प्रमाण अधिक होते. याशिवाय कणकवली, वैभववाडीच्या पूर्वपट्ट्यात पावसाचा छिडकावा झाला. दरम्यान, शनिवारी (ता.३०) सकाळपासून जिल्ह्यात सर्वत्र ढगाळ वातावरण आहे. उन्हाची तिव्रता वाढली असून अंगाची लाही लाही होत आहे.

ढगाळ वातावरण आणि काही भागात पडलेल्या पावसामुळे आंबा, काजू बागायतदार चांगलेच धास्तावले आहेत. नियमित आंबा हंगाम ऐन तोंडावर असताना वातावरणात प्रचंड बदल झाला असल्यामुळे आंबा बागायतदारांची चिंता वाढली आहे.

काजू बागायतदारांची देखील तीच स्थिती आहे. हवामान विभागाने जिल्ह्यात हलक्या पावसाचा अंदाज दिला आहे. मात्र वातावरण ढगाळ राहणार असल्याचे स्पष्ट केले.