Agriculture and the Marketing Department : राज्यात सोयाबीन खरेदीला मुदत वाढ देण्यात आली नाही, असं राज्याच्या पणन विभागाने स्पष्ट केलं आहे. केंद्रीय कृषिमंत्री शिवराजसिंह चौहान यांनी सोमवारी (ता.१०) महाराष्ट्रात २४ दिवस आणि तेलंगणात १५ सोयाबीन खरेदीसाठी मुदत वाढ दिल्याचं सोशल मीडियावर जाहीर केलं होतं. परंतु ही मुदत वाढ नसल्याचं राज्य पणन विभागाकडून सोमवारी रात्री उशिरा स्पष्ट करण्यात आलं.

यामुळे पुन्हा एकदा सोयाबीन उत्पादक शेतकऱ्यांच्या पदरात निराशा पडली आहे. केंद्रीय कृषिमंत्री आणि पणन विभागाच्या या परस्परविरोधी माहितीमुळे राज्यातील सोयाबीन उत्पादक शेतकऱ्यांमध्ये मात्र गोंधळाची स्थिती निर्माण झाली आहे.

१२ जानेवारी ही सोयाबीन खरेदीची अंतिम मुदत होती. परंतु केंद्र सरकारने ६ फेब्रुवारीपर्यंत सोयाबीन खरेदी करत २४ दिवसांची मुदत वाढ दिली, असा केंद्रीय कृषीमंत्र्यांच्या माहितीचा अर्थ असल्याचं पणन विभागाने स्पष्टीकरण दिलं आहे.

पणन विभागाच्या स्पष्टीकरणानुसार, "काही माध्यमांमधून सोयाबीन खरेदीस महाराष्ट्रात २४ दिवस व तेलंगणा मध्ये १५ दिवस मुदतवाढ देण्यात आल्याचे केंद्रीय मंत्री शिवराजसिंह चौहान यांनी सांगितल्याची बातमी आज देण्यात आली आहे. तथापि ही नव्याने देण्यात आलेली मुदतवाढ नसून सोयाबीन खरेदीसाठी केंद्र शासनाने दिनांक ६ फेब्रुवारी २०२५ नंतर कोणतीही मुदतवाढ दिलेली नाही," असं राज्याच्या पणन विभागामार्फत स्पष्ट करण्यात आलं आहे.

राज्यात हमीभाव केंद्रावर नोंदणी केलेल्या शेतकऱ्यांचं सोयाबीन अद्यापही खरेदी करण्यात आलेलं नाही. ६ फेब्रुवारी सोयाबीन खरेदीची अंतिम मुदत होती. शेतकऱ्यांनी खरेदी केंद्रावर विक्रीसाठी रांगा लावल्या होत्या. त्यामुळे सरकारने सोयाबीन खरेदीला मुदत वाढ द्यावी, अशी मागणी शेतकरी करत आहेत.

या मागणीदरम्यान केंद्रीय कृषिमंत्र्यांनी सोशल मीडियावर महाराष्ट्रात सोयाबीन खरेदीला २४ दिवसांची मुदतवाढ अशी शेखी मिरवली. केंद्रीय कृषिमंत्र्यांच्या या पोस्टमुळे माध्यमांमध्ये खरेदीला मुदत वाढ देण्यात आल्याच्या बातमी प्रसिद्ध झाली.

यामुळे शेतकऱ्यांना काहीसा दिलासा मिळेल, अशी शक्यता होती. परंतु सोयाबीन खरेदीला मुदत वाढ देण्यात आली नसल्याचं राज्याच्या पणन विभागाकडून स्पष्टीकरण देण्यात आलं आहे. शेतकऱ्यांना मात्र केंद्र आणि राज्य सरकारच्या या गोंधळाचा मोठा मनस्ताप सहन करावा लागला. तसेच केंद्रीय कृषिमंत्र्यांनी हेडलाईन मॅनेजमेंटचा प्रयत्न केल्याची टिका शेतकरी करत आहेत.