Solapur News : बीबीदारफळ (ता. उत्तर सोलापूर) येथील लोकमंगल अॅग्रो इंडस्ट्रीज लिमिटेडच्या २४ व्या गळीत हंगामाचा प्रारंभ नुकताच ह. भ. प. सुधाकरमहाराज इंगळे यांच्या हस्ते उसाची मोळी गव्हाणीत टाकून करण्यात आला.

कारखान्याचे अध्यक्ष महेश देशमुख, संचालक प्रशांत पाटील, सरव्यवस्थापक सुनील घालमे प्रशासकीय व्यवस्थापक विवेक पवार, शेती अधिकारी ज्ञानदेव मारकड, चीफ इंजिनियर प्रदीप काळे, चीफ केमिस्ट विजय यादव, डिस्टिलरी मॅनेजर यादव, मॅनेजर प्रवीण काळे, विशाल देशमुख, ब्रह्मदेव जाधव, राजू ननवरे, सचिन ननवरे आदी यावेळी उपस्थित होते.

यावेळी बोलताना ह. भ. प. इंगळेमहाराज यांनी कारखान्याकडून शेतकऱ्यां प्रती दाखवला जाणार आदर आणि अध्यात्माला दिले जात असलेले महत्त्व याचे कौतुक केले. शेतकऱ्यांनीही या विश्वासाची परतफेड ऊस देऊन करा, असे आवाहन केले. यावेळी कारखान्याचे अध्यक्ष महेश देशमुख यांनीही सभासदांच्या विश्वासामुळेच कारखाना प्रगती करतो आहे, असे सांगितले.

हरिनाम सप्ताहाने हंगामाची सुरवात

कारखान्याच्यावतीने दरवर्षी हंगामाचा प्रारंभ करण्यापूर्वी कारखाना कार्यस्थळावर अखंड हरिनाम सप्ताहाचे आयोजन केले जाते. ह.भ.प. सुधाकरमहाराज इंगळे यांच्या नेतृत्वाखाली गेल्या २४ वर्षापासून ही परंपरा सुरु आहे.

यंदाही ७ ते १३ नोव्हेंबर या कालावधीत हा हरिनाम सप्ताह पार पडला आणि शेवटच्यादिवशी इंगळे महाराजांच्या काल्याच्या कीर्तनाने आणि त्यांच्याच हस्ते उसाची मोळी गव्हाणीत टाकून हंगामालाही प्रारंभ करण्यात आला.