Barshi News : बार्शी तालुक्यात गेल्या काही दिवसांपासून तरस आणि मध्यंतरी वाघाची चर्चा सुरू झाल्यानंतर आता पुन्हा एकदा बिबट्याचा वावर आढळल्याने चिंता वाढली आहे. विशेषतः शेतकऱ्यांना रात्री पिकांना पाणी देण्यास जावे लागते, पण सध्या त्यांना जीव मुठीत घेऊन जावे लागत असल्याने शेतकरी हैराण झाले आहेत.

बोरगाव (ता. बार्शी) येथे बिबट्या रविवारी (ता. २२) रात्री सव्वाअकरा वाजता शेतकऱ्यांना दिसून आला. त्यानंतर सरपंच, पोलिस पाटील यांचेसह ग्रामस्थांनी रात्र जागून काढली. वन विभागानेही बिबट्या असल्याचा दुजोरा दिला आहे, तर मंगळवारी (ता.२४) ढेंबरेवाडी (ता. बार्शी) येथे तलावाजवळ वनविभागाच्या कॅमेऱ्यात वाघ आढळल्याने शेतकऱ्यांमध्ये चिंतेचे वातावरण पसरले आहे .

मागच्या काही दिवसांपासून बार्शी आणि परिसरात बिबट्याची मोठी भीती पसरली असून, प्राण्यांवर हल्ल्यांचे प्रकारही घडले आहेत. या दोन्ही घटनांत वनविभागाला ग्रामस्थांनी कल्पना दिली. पण ते वेळेत आलेच नाहीत. पण जवळपास त्यांचे कर्मचारी दोन तासांनी आले आणि त्यांच्याकडे काठी आणि बॅटरी वगळता अन्य काहींही उपाययोजना नव्हत्या, असे प्रत्यक्षदर्शी ग्रामस्थांचे म्हणणे आहे.

वनविभागाने गांभीर्यपूर्वक या विषयाची हाताळणी केली पाहिजे, असेही ग्रामस्थांनी म्हटले आहे. बिबट्या आणि पुन्हा वाघ अशा वन्यप्राण्यांमुळे भीती वाढली असून, शेतकरी शेतात जाण्यासाठी घाबरत आहेत. सध्या ऊस तोडीची कामे जास्त प्रमाणात चालू आहेत. त्यामुळे उसाचे क्षेत्र रिकामे होत असल्याने लांडगा, तरस, बिबट्या असे वन्यप्राणी बाहेर पडत आहेत, दरम्यान, वनपरिक्षेत्र अधिकारी अलका करे यांनी बिबट्याच्या हल्ल्यापासून वाचण्यासाठी घ्यावयाची काळजी याबाबत प्रसिद्धिपत्रक जारी केले आहे. तसेच घाबरून न जाता वनविभागाशी संपर्क साधा, असे आवाहन केले आहे.

...इथे साधा संपर्क

वनविभागाने बिबट्यासह अन्य वन्यप्राण्यांसाठी ट्रॅप कॅमेरे लावले आहेत. पण तालुक्यातील त्यांचा वावर लक्षात घेऊन ग्रामस्थांना सूचना केल्या आहेत. त्यासाठी कर्मचाऱ्यांचे मोबाइल क्रमांक दिले आहेत. त्यात एस. ए. शेख ९०७०२३४४३६, एम. डी. मुळीक मो.नं. ७०५८४११६९७, के. डब्ल्यू. शेख, ७४९९७७२८२७, बी. आर. धुमाळ ८८०५१०७८८२ एस. एस. पुरी, ७६२००६०१८१, एम. पी. शेळके ९९२१३८३४३४ यांचा समावेश आहे. तसंच अडचण आल्यास किंवा माहितीसाठी यांच्याशी संपर्क करा, असे आवाहनही केले आहे.