Land Mafia : वसई-विरार महापालिका क्षेत्रातील प्रभाग समिती पेल्हारअंतर्गत येणाऱ्या वाकनपाड्यातील आदिवासी बांधवांच्या न्यायप्रविष्ट जमिनींवर भूमाफियाद्वारे अतिक्रमण सुरू आहे.

मात्र पेल्हार प्रभागाचे सहायक आयुक्त भूमाफियांची पाठराखण करीत आहेत, असा आरोप अखिल भारतीय किसान सभेने केला आहे. याबाबत अखिल भारतीय किसान सभेने पालिका मुख्यालयावर आंदोलन केले.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

आदिवासी जागेवरील या मुख्य प्रश्नासह जनतेच्या विविध प्रलंबित समस्या या वेळी प्रशासनापुढे मांडण्यात आल्या.

या वेळी अखिल भारतीय किसान सभेचे अध्यक्ष गणेश दुमाडा, तालुका सहसचिव विद्याधर हरवटे, तालुका उपाध्यक्ष विजय पाटील, सदस्य मनोज गुप्ता, देवराम पाटील तसेच समाजसेवक अंकित तिवारी, नीतेश अंधेर आदींसह जागामालक अरुणा चिमडासह शेकडो आदिवासी बांधव उपस्थित होते.

पेल्हार प्रभाग क्षेत्रातील वाकन पाडा परिसरात भूमाफियांमार्फत आदिवासी जमनींवर अतिक्रमण सुरू आहे. याबाबत आदिवासी बांधवांनी सहायक आयुक्त मनाली शिंदे यांच्याकडे लेखी तक्रारी केल्या.

उपायुक्त (अतिक्रमण) अतिरिक्त आयुक्तांचीही भेट घेऊन अतिक्रमण निदर्शनास आणून दिले; आतापर्यंत ‘कारवाई करतो’ या आश्वासनापलीकडे ठोस कारवाई झालेली नाही.