Amravati News : सोयाबीनवर कीडरोगांचा प्रादुर्भाव होत असून, काही भागात पीक संकटात आले आहे. तर, दुसरीकडे कीडरोगांपासून वाचलेल्या सोयाबीनच्या सोंगणीचा प्रश्‍न गंभीर झाला आहे.

जिल्ह्याच्या काही भागात मेळघाटातील मजुरांचा सोयाबीन सोंगणीला आधार ठरतो. परंतु यंदा राज्याच्या ज्या भागात मजुरी जिकडे अधिक तिकडे मजूर जात असल्याने अमरावती जिल्ह्यातील शेतकऱ्यांची चिंता वाढीस लागली आहे.

राज्याच्या इतर भागात मजुरांच्या उपलब्धतेची अडचण जाणवेल, परंतु अमरावती जिल्ह्यात आजवर ती तितकीशी जाणवत नव्हती. त्यामागे मेळघाट तसेच लगतच्या मध्य प्रदेशातून होणारी मजुरांची उपलब्धता हे कारण होते.

हे मजूर कुटुंबीयांसह येत असल्याने शेतात त्यांच्या निवाऱ्याची सोय केली की झाले, अशी स्थिती होती. यंदाच्या हंगामात मात्र सोयाबीन सोंगणीकरीता मजुरांच्या शोधात वणवण भटकंतीची वेळ शेतकऱ्यांवर आली आहे. मेळघाटातील कोरकू आदिवासींची मजूर टोळी सोंगणीकामी या भागात राहते. गेल्या हंगामात सोयाबीन सोंगणीचे दर २२०० ते २३०० रुपये होते.

यंदा मात्र राज्याच्या काही भागात ३००० रुपये प्रती एकरापेक्षा अधिक दर मिळत असल्याने हे आदिवासी मजूर अशा भागात जाण्याला प्राधान्य देत आहेत. परिणामी अमरावतीच्या बहुतांश भागात या मजुरांची उपलब्धताच होत नसल्याचे सांगितले जाते.

परिणामी शेतकऱ्यांची चिंता वाढली आहे. त्याच कारणामुळे दर्यापूर तालुक्‍यातील काही गावांमध्ये एकरी २८०० ते ३००० रुपये असा दर आहे. यामुळे उत्पादकता खर्च वाढला असताना दुसरीकडे बाजारात आर्द्रता अधिक असल्याचे कारणामुळे सोयबीनला कमी दर मिळत आहे. यामध्ये शेतकरी मात्र पिचला गेला असून शासनाने अशावेळी बाजारात हस्तक्षेप करावा, अशी मागणी त्यांच्यामधून होत आहे.