Nashik News : जिल्ह्यातील पूर्व भागात प्रामुख्याने मालेगाव, नांदगाव व येवला तालुक्यातील शेतकरी कापूस लागवडी करतात. यंदाही मोठ्या प्रमाणावर लागवडी आहेत. मात्र, पावसामुळे नुकसान होऊन उत्पादन घटल्याची स्थिती आहे.

एकीकडे उत्पादनात फटका तर दुसरीकडे कापूस वेचणीसाठी मजूर मिळत नसल्याने शेतकऱ्यांच्या अडचणी वाढल्याने शेतकरी अडचणीत सापडला आहे.

पूर्व भागात प्रामुख्याने मालेगाव तालुक्यातील माळमाथ्यावरील झोडगे, भिलकोट, पळासदरे, साजवहाळ, पाडळदे, शेरूळ, हिसवाळ, शेंदुर्णी, रोझांणे, खलाणे, कळवाडी, दहिवाळ, देवघट, चिंचगव्हाण आदी गावांमध्ये ही परिस्थिती आहे.

अनेक ठिकाणी पहिली वेचणी झालेली नाही. तर काही ठिकाणी दुसरी वेचणी सुरू असताना मजूर मिळत नसल्याने कापूस झाडावर लोंबत असल्याचे शेतकऱ्यांनी सांगितले. मजुरांची उपलब्धता होण्यासाठी शेतकरी दैनंदिन रोजंदारीपेक्षा जास्तीचे पैसे देऊ करत असतानाही मजूर मिळत नसल्याने शेतकरी मेटाकुटीला आला आहे.

त्यामुळे हंगामी कामे आटोपून घेण्यासाठी घरच्या सदस्यांच्या मदतीने कापूस वेचणी करत आहेत. मात्र तुलनेत मनुष्यबळ कमी असल्याने कामकाज वेळेवर होत नसल्याचे चित्र आहे. अनेक ठिकाणी शेतकरी स्थानिक मजूरांकडे कामांसाठी चौकशी करत आहेत; मात्र ते उपलब्ध होत नसल्याने बाहेरगावावरून वाहनाद्वारे मजुरांना कापूस वेचणीसाठी आणण्याची वेळ आली आहे.

शेतकऱ्यांची चहूबाजूने कोंडी

मागील वर्षी २०० रुपये होती. तर यंदा ३०० रुपयांचे रोजंदारी होती. काही ठिकाणी ६ रुपये किलोप्रमाणे वेचणी केली जायची. हेच दर आता १० ते १२ किलोप्रमाणे मजूर सांगत आहेत.परिणामी शेतकऱ्यांची चहूबाजूने कोंडी होत आहे.