Pune News : खेड तालुक्यातील पुणे चक्राकार महामार्गाच्या संपादनामध्ये शेतकऱ्यांवर अन्याय झाला आहे. शेतकऱ्यांना आश्वासन दिल्याप्रमाणे संपादित केलेल्या जमिनीचा मोबदला दिला जात नसून तो मोबदला कमी दराने दिला आहे.

त्यामुळे शेतकऱ्यांमध्ये संताप व्यक्त केला जात आहे. संपादित जमिनीचा जादा दराने मोबदला द्यावा, यासाठी रिंगरोड विरोधी प्रति समितीच्या माध्यमातून कृषी युवा क्रांती संघटनेने सोमवार (ता. १६)पासून भूसंपादन कार्यालयासमोर बेमुदत उपोषण सुरू केले आहे.

कृषी युवा क्रांती संघटनेचे अध्यक्ष प्रसाद घेनंद, जिल्हा परिषद सदस्य अतुल देशमुख, कृष्णा खोरे विकास महामंडळाचे संचालक राम गावडे, माजी सरपंच चंदन मोरे, राहुल शिंदे आंदोलनात सहभागी झाले आहेत.

या बाबत प्रसाद घेनंद, म्हणाले की, ‘‘शेतकऱ्यांवर अन्याय होत असल्याने सरकारने लक्ष देऊन खेड तालुक्यातील शेतकऱ्यांना न्याय द्यावा.

...या आहेत प्रमुख मागण्या

आपण दिलेली १९ (ब)ची भूसंपादनाची नोटीस तत्काळ रद्द करावी.

प्रभाव क्षेत्राची अट वगळून खेड तालुक्यातील बारा गावांमध्ये ग्रामीण विभागाप्रमाणे मोबदला दिला जावा.

आमचा प्रकल्पाला विरोध नाही परंतु चुकीचे निकष लावून दिल्या जाणाऱ्या मोबदल्याला आमचा विरोध आहे.

बागायत, हंगामी बागायत यांच्या चुकीचे निकष काढून सर्व क्षेत्राला बागायत प्रमाणे मोबदला दिला जावा.

मागील आंदोलनाचे सगळे गुन्हे मागे घेतले जावे.

मरकळ आणि गोलेगावसाठी १५ मीटर सेवा रस्ता दिला जावा.